.png)
Dili – Kuarta-feira, 04/12/2024
Ministériu Edukasaun reprezenta husi Diretora Jerál Administrasaun no Finansas hamutuk asesor/a Gabinete Ministra, Diretora Nasional Ensinu Báziku ho nia Xefe Departamentu sira halo despedida ho estudante manan na’in ba kompetisaun Sertame Nível Nasionál Ensinu Báziku hodi hala’o vizita ba nasaun Australia.
Manan na’in ba sertame nível nasional Ensinu Báziku ne’e husi Eskola Ensinu Báziku Sentral 3 siklu Diligência, Letefoho, Same, Manufahi ho totál 1.450 pontus ne’ebé realiza iha loron 17/11/2024 iha salaun Oe-upun, RAEOA.
Iha sorumuto despedida ne’e, Diretora Jeral Administrasaun no Finansas (DGAF) Sra. Cecília M. Belo de Assis hateten, “ida ne’e hanesan oportunidade di’ak ida ba estudante no mos manorin sira ne’ebé hanesan manan na’in ba sertame nível nasional ensinu báziku, parabens ba estudante sira nia esforsu tomak no mos profesór sira nia esforsu ba estudante sira iha kompetisaun husi Nível Rejional tama to’o Nível Nasionál hodi hetan 1 lugar”
“Governu liu husi Ministériu Edukasaun fó oportunidade ba manan na’in sira atu ba koñese ita nia nasaun viziñu Australia, ida ne’e hodi fó motivasaun ba estudante sira iha Timor laran tomak katak estuda no aprende ne’e diak liu, atu kapasita an atu bele lori ita rain ne’e ba oin” ténik DGAF.
Entretantu estudante vensedor sira nia vizita ba nasaun Australia ne’e hetan akompañamentu husi ekipa husi Ministériu Edukasaun, manorin sira, Diretora Servisu Edukasaun Munisípiu Manufahi no sei halo vizita ba eskola sira Merlbourne Australia durante loron 10.
#MédiaME
