Covalima, Kinta-feira, 28/11/2024
Ministériu Edukasaun liu husi Diretór Jerál Edukasaun Pré-Eskolár Ensinu Báziku no Ensinu Rekorente (DG EPEBER) Sr. Apolinário Serpa Rosa sai Inspetór ba serimónia ixár bandeira ba Komemorasaun loron Proklamasaun Independénsia ba Dala-49, iha suku Fohorem, Postu Administrivu Fohorem, Munisípiu Covalima.
Iha diskurso, Inspetór serimónia DG EPEBER Apolinário Serpa Rosa hateten, "Mensajen Sua Exelénsia Prezidente RDTL nian, subliña Edukasaun, Saúde no Direitus Umanus, ita halo ona progresu iha tinan 22 ikus ne’e dezde Restaurasaun Independénsia, liuliu estabelesimentu sistema Ensinu Báziku obrigatóriu, universál no gratuitu, ho rede eskola Públika ne’ebé prezente iha Aldeia no postu Administrativu hotu-hotu. Ita valoriza mós komplementariedade ne’ebé lori hosi eskola referénsia sira, ne’ebé koñesidu nu’udar eskola CÁFE (Centros de Aprendizagem e de Formação Educativas), no husi eskola sira ne’ebé jere husi igreja, ne’ebé reforsa resposta estadu nian iha nível oioin edukasaun nian"
Setór edukasaun mós ezije ita nia atensaun, ita presiza hadi'a kondisaun ensinu aprendizajen, ho foku foun ba rede ensinu pré-Primáriu, Ensinu Báziku, Ensinu Sekundáriu no Tékniku-Vokasionál, "Dehan inspetór serimónia, DGEPEBER".
Iha eventu komemorativu istóriku ne'e, partisipa husi Dirijente ME nian, Administradór Postu Administrativu Fohorem, Komandante Eskuadra PNTL Postu Administrativu Fohorem, Na'i Veteranu/a sira, komunidade sira husi suku 4, Manorin no mos estudante sira.
