Dili - Segunda-feira, 02 Dezembru 2024
Ministériu Edukasaun, liuhusi Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Sr. Domingos Lopes Lemos sai Inspetór ba Serimónia Isar Bandeira iha semana dahuluk fulan Dezembru Segunda-feira ne’e.
Iha ámbitu isar bandeira ne’e, Sua Exelénsia hateten, no hato’o parabéns ba sidadaun hotu ne’ebé mak partisipa ona iha isar bandeira hodi komemora loron proklamasaun unilateral iha loron 28 Novembru tinan ne’e hodi kompleta ba tinan 49 iha semana kotuk.
“Husu ba lideransa hotu-hotu atu tau atensaun no kontrola servisu hotu ho posível liu-liu mensajen husi Primeiru-Ministru iha OGE hateten katak tinan oin mai 2025 hanesan tinan servisu nian, husu ba ita hotu atu kontrola servisu no prosesu tomak iha terrenu tanba, iha baze sai hanesan sasukat ba ita-nia servisu hotu iha Ministériu Edukasaun, entaun iha kraik ladún di’ak bele afeita mos ba iha ita”, afirma Sua Exelénsia Sekretáriu Estadu ESJ-ESTV, Sr. Domingos Lopes Lemos.
Governante ne’e mós reafirma tan katak iha tempu udan presiza apoiu emerjénsia tanba sira barak labele hanorin iha sala laran tanba kondisaun edifísiu eskola sira ladún di’ak atu hala’o aprendizajen iha fatin refere. Nesesidade ba fiskalizasaun sei falta hela, inspetór sira relata katak informasaun ne’e tenke fornese lalais no presiza foti asaun lalais atu nune’e labele prejudika servisu aprendizajen iha klase laran.
Serimónia isar bandeira iha semana dahuluk fulan Dezembru ne’e hetan partisipasaun masímu husi dirijente Ministériu Edukasaun.
#MídiaME
