Ermera, 03-12-2024
Sua Exelénsia Ministru Edukasaun Interinu Sr. Domingos Lopes Lemos hamutuk ho Diretór Jerál Ensinu Sr. Deolindo da Cruz partisipa iha selebrasaun aniversáriu eskola Sekundária Katólika nossa Senhora do Carmo ba dala-10 Letefoho.
Iha diskursu Sua Exelénsia Ministru Edukasaun Interinu Sr. Domingos Lopes Lemos hateten, ho ksolok no onra bo'ot ohin ita halibur malu hodi Selebra tinan 10 aniversáriu Eskola Sekundária Katólika Nossa Senhora do Monte Carmelo, NOSCAR, Letefoho, no data espesiál ida-ne’e, ita selebra pilár fundamentál tolu (3) ne’ebé orienta instituisaun ida-ne’e, Formasaun, Animasaun no Orasaun. Iha tinan 10 ikus ne’e, NOSCAR dedika an tomak hodi forma ita-nia foinsa’e sira, prepara sira atu sai sidadaun ne’ebé iha konsiénsia, responsabilidade komprometidu ba futuru iha ita-nia rai doben Timor-Leste nian.
"Tanba ne'e animasaun eskolár, sai hanesan buat ida ne'ebé importante tebes hodi kuda ambiente ida ne'ebé halibur no haburas estudante sira bele esplora sira nia kriatividade no talentu, hodi dezenvolve abilidade esensiál sira moris nian, Ksolok kriatividade no espíritu komunitáriu maka marka sira ne'ebé labele halakon hosi eskola katólika sira. liuhosi, orasaun fó hanoin mai ita konaba ita-nia ligasaun ho divinu, importánsia espiritualidade nian iha ita-nia moris no nesesidade atu apoia malu iha fiar no solidariedade.
Iha sentidu ida-ne’e, Ministériu Edukasaun introdús dixiplina “Fraternidade Umanu, Morál no Étika”, ne’ebé hetan inspirasaun husi Sua Santidade Papa Francisco no Grande Imam Al-Azhar nia hanorin, hodi promove páz no konvivénsia armonioza.
Governante ne'e hatútan-tan ba Manorin na'in sira, Edukasaun nu’udar direitu fundamentál sidadaun nian no instrumentu prinsipál ba dezenvolvimentu sosiál no ekonómiku, no mós atu kria sosiedade ida ne’ebé saudável no prósperu hodi alkansa kualidade edukasaun ne’ebé di’ak liu, ho oportunidade asesu ne’ebé luan liu ba ema hotu, ida ne’e nu’udar edukasaun ne’ebé iha kapasidade atu hatán duni ba nesesidade sira merkadu traballu nian, hodi kontribui ba redusaun dezempregu, liuhosi aprendizajen iha moris tomak, no esensialmente hakotu sírkulu viziuzu pobreza interjerasionál nian.
#MédiaME
