Dili, 03/07/2024
Ministru Edukasaun Interinu Sr.Domingos Lopes Lemos partisipa iha reuniaun Konsellu Ministru ne’ebé lidera husi Exelénsia Primeiru Ministru Kay Rala Xanana Gusmão iha Palasiu Governu kuarta-feira ne’e.
Konsellu Ministru hala’o sorumutu iha Palásiu Governu hodi aprova projetu Rezolusaun Parlamentu Nasionál, ne’ebé aprezenta husi Vise-Ministra ba Asuntu ASEAN, Milena Maria da Costa Rangel, hodi ratifika akordu kona-ba Izensaun Vistu entre Repúblika Demokrátika Timor-Leste ho Governu Repúblika Singapura ba Titulár Pasaporte Diplomátiku, Ofisiál ka Servisu no Ordináriu nian no Reinu Tailándia ba Objetivu Turístiku ba Titulár Pasaporte Komún.
Governu husi Sua Majestade Sultaun no Yang Dipertuan husi Brunei Darussalam ba Titulár Pasaporte Diplomátiku no Ofisiál ka servisu nian.
Vise-Ministra ba Asuntu ASEAN, Milena Maria da Costa Rangel, halo mós aprezentasaun ida ba Konsellu Ministru kona-ba Relatóriu tinan 2024 nian relasiona ho progresu iha implementasaun Roteiru ba Adezaun Timor-Leste hanesan Membru Plenu ASEAN nian.
Konsellu Ministru mós aprova projetu Rezolusaun Governu, ne’ebé aprezenta mós husi Vise-Ministra ba Asuntu ASEAN, Milena Maria da Costa Rangel, ne’ebé aprova Kontribuisaun ida, ho valór dolar amerikanu rihun 200, ba Sekretariadu Tékniku ASEAN.
Tuir mai Ministru Prezidénsia Konsellu Ministru, Agio Pereira no Ministru Administrasaun Estatál, Tomás do Rosário Cabral, halo aprezentasaun ida kona-ba Sistema Rezíduo Sólidu Urbanu iha Dili.
#jornalistarita
#MédiaME
