Bobonaro, Cailaco, kinta-feira, 11 abríl 2024
Sua Exelénsia Ministra Edukasaun Dra. Dulce de Jesus Soares partisipa iha audiénsia públika hodi ko’alia kona-ba dezafiu sira ne’ebé mak iha atu oinsá bele garante kualidade profesór/a sira nian iha prosesu aprendizajen. Atividade audiénsia públika ne’e realiza iha Postu Administrativu Cailaco, Munisípiu Bobonaro.
Iha diskursu, S.E Ministra Edukasaun Dra. Dulce de Jesus Soares hateten, Ministériu Edukasaun labele garante númeru profesór/a ne’ebé adekuadu, maibé importante liu mak garante númeru profesór/a ne’ebé sufisiente, maibé ho kompeténsias adekuadu, tambá sira mak servisu hamutuk ho alunu sira hodi fasilita labarik sira-nia prosesu aprendizajen.
“Liuhusi ha’u nia observsaun iha eskola sira, seidauk halo jestaun di’ak, ezemplu seidauk máximiza ulizasaun rekursu sira hanesan livru iha eskola atu labarik sira uza, pedagójia hanorin literásia ba labarik sira seidauk di’ak nsst. Rezultadu aprendizajen hosi labarik sira-nian nu’udar reflesaun kona-ba kualidade no kompeténsia profesór/a sira-nian ne’ebé seidauk forte”, dehan S.E. Ministra Edukasaun.
Governante ne’e hatutan, Ministériu Edukasaun ninia prioridade importante ida mak prevé formasaun kontinua ba profesór/a sira ho aproximasaun no modalidade oioin inklui liuhusi akompañamentu no mentorizasaun, reforsa ulizasaun “Grupos Trabalho dos Professores” (GTPs), utiliza téknolojia no kontinua fornese oportunidade aprendizajen no dezenvolvimentu profesionál ne’ebé regulár no modalidade sira seluk.
Tanba ne’e, Ministériu Edukasaun liuhusi INFORDEPE mós hahú halo identifikasaun ba profesór/a sira nia nesessidade ba formasaun ka área kompeténsia sira ne’ebé sei fraku nomós saida mak sira presiza hanesan nesesidades ba dezenvolvimentu profesionál. INFORDEPE sei fornese konteúdu formasaun sira ne’ebé korespondente ba profesór/a sira-nia nesesidade, inklui mós formasaun Lian Portugés no Tetun.
#jornalistaluis
#MédiaME
