Bobonaro, Cailaco, kinta-feira, 11 abríl 2024
Sua Exelénsia Ministra Edukasaun Dra. Dulce de Jesus Soares hala’o vizita ba Ensinu Báziku Filiál (EBF) Maumela, Postu Administrativu Cailaco hodi haree no observa direta konstrusaun edifisíu eskola foun.
Iha vizita ne’e, S.E. Ministra Edukasaun Dra. Dulce de Jesus Soares hateten, konstrusaun Edifísiu eskola foun EBF Maumela ne’e atraza oituan, tanba iha problema dezastre naturais ne’ebé rezulta ponte kotu no tenki ba halo kompras iha Díli nomós enjineiru ne’ebé toma konta projetu ne’e hetan fali projetu seluk, nune’e, kontribui ba projetu ne’e la’o tarde.
“Projetu refere kuaze atu ba ona pursentu 25%, tanba ne’e ami ko’alia ona ho grupu atu bele aselera prosesu ne’e atu bele iha tinan letivu foun, estudante sira bele uza ona sala aula ne’e no profesór/a sira mós bele iha ona eskritóriu”, dehan Ministra Edukasaun.
Governante ne’e hatutan, projetu ne’e la’os implementa husi kompania, maibé grupu komunitáriu ka projetu komunitáriu ne’ebé kompostu husi “Acossiação dos Pais e Professores”, Líder Komunitáriu nomós Koordenadór no Diretór Eskola sira.
Enkuantu edifísiu eskola foun ne’e kompostu husi sala aula rua (2) no eskritóriu ba profesór/a ida (1), dadaun ne’e atinji ona besik pursentu 25%.
#jornalistaluis
#MédiaME
