ME LANSA PROGRAMA ALMA BA MUNISÍPIU ERMERA
ME LANSA PROGRAMA ALMA BA MUNISÍPIU ERMERA
Ermera; 01/03/2024 - Ministra Edukasaun Dra. Dulce de Jesus Soares hamutuk ho Primeira Sekretária Asuntu Edukasaun Embaxada Australia Sra. Fiona Meehan, reprezentante Banko Mundiál Sra. Adelaide Camões no dirijente Ministériu Edukasaun, halo lansamentu programa Apoiu Lideransa Mentoria no Aprendizajen (ALMA) ba Munisípiu Ermera, iha Eskola Ensinu Báziku Setrál (EBC Sigla Portugés) Dona Ana Lemos Ermera.
Iha Diskursu Ministra Edukasaun Dra. Dulce de Jesus Soares informa, programa ALMA kontinua fó apoiu ba manorin sira, diretór eskola, adjuntu no gabinete apoiu tékniku, atu nune’e hamutuk bele hala’o prosesu aprendizajen no jere eskola ho di’ak.
"Se ita hotu ohin loron halo komitmentu katak, ita atu halo mudansa iha ita-nia eskola, signifika katak responsabilidade ne’e iha ita boot sira. Ami-nia responsabilidade servisu hamutuk ho ajénsia sira ho formadór Timoroan sira ne’ebé mak iha ona esperiénsia, fahe fali matenek ba ita boot sira, atu ita bele implementa di’ak liután programa sira iha eskola”, dehan Ministra Edukasaun.
Iha fatin hanesan Primeira Sekretária Asuntu Edukasaun Embaxada Australia Sra. Fiona Meehan esklarese, edukasaun mak xave ba dezenvolvimentu iha nasaun ne’ebé de’it, tanba ne’e mak Australia kontinua apoiu Ministériu Edukasaun hodi mellora Ensinu Báziku iha Timor-Leste ba tempu naruk liu-husi programa ALMA.
Aleínde ne’e, reprezentante Banko Mundiál Sra. Adelaide Camões hateten, mentór sira sei ajuda manorin sira, diretór eskola, adjuntu no gabinete apoiu tékniku, tanba sira la’os inimigu, maibé sira imi-nia kolega, atu ajuda imi, servisu hamutuk.
Nune’e fo hanoin fali katak, iha Munisípiu Ermera mentór hamutuk na’in 22 mak tuir ona formasaun iha fulan Janeiru tinan 2024, hafoin simu ona sertifikadu iha ámbitu lansamentu programa ALMA no sei fó apoiu ba prosesu aprendizajen no jere eskola ho di’ak iha Munisípiu Ermera.
