Dili,18-07-2024
Ministériu Edukasaun liuhusi Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, husu ba estudante na’in-haat (4) ne’ebé reprezenta estudante Timoroan hodi ba tuir kompetisaun Olimpíada Matemátika iha Portugál atu hatudu rezultadu di’ak iha kompetisaun refere. Lia-ne’e hato’o, hafoin hasoru estudante sira iha sala Konferénsia Ministériu Edukasaun Villa- Verde.
Iha intervensaun Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos dehan, CPLP iha programa barak, ne'ebé durante ne’e envolve Ministériu Edukasaun iha Rede da Escola Amigas, tanba ne’e studante na’in haat sei reprezenta estudante Timoroan ba iha kompetisaun olimpíada Matemátika iha Portugál.
“Ne'e hanesan motivasaun ba estudante sira seluk hodi estuda badinas atu bele kompete ho ema seluk, tanba ne'e agradese ba inan-aman no Profesór sira ne'ebé durante ne'e uza métodu di'ak iha prosesu Ensinu nian", dehan S.E. Sekretáriu Ezekutivu ESJ-ESTV.
Governante ne’e hatutan, estudante na’in haat (4) ne'e sei reprezenta Timor-Leste ba iha Portugál no sei hatudu valór di’ak, hatudu vontade di’ak, nune’e tuir kompetisaun ho susesu.
Estudante na’in-haat ne’e kompostu husi Eskola Sekundáriu Jerál 5 de Maio, Eskola Café Dili, Eskola Koléjiu Santu Inácio de Loiola Kasait no kompetisaun ne'e sei hahú iha loron 23 to’o 28 fulan Jullu tinan 2024.
#jornalistamario
#MédiaME
