Díli, 18 fulan Jullu 2024
Ministériu Edukasaun halo asinatura akordu kooperasaun Bilaterál ho Governu Brazil kona- ba Projetu Pilotu Formasaun Dosente iha Ensinu Sekundáriu Tékniku Vokasionál iha Timor-Leste. Akordu ne’e asina iha sala konferénsia Ministériu Edukasaun Villa-Verde kinta-feira ne’e.
Iha Diskursu Sua Exelénsia Sekretáriu Estadu ESJ-ESTV Sr.Domingos Lopes Lemos hateten, programa IX Governu Konstitusionál nian mak setór edukasaun esensiál tebes, atu alkansa edukasaun ida transformativa ba sosiedade Timor-Leste hodi alkansa vizaun ba dezenvolvimentu.
"Kolaborasaun Timor-Leste no Brazil iha área Edukasaun nian hamosu ona rezultadu sira ne'ebé di'ak iha pasadu liuhusi programa oioin, no ami motiva tebes ho perspetiva futuru nian hodi eleva parséria ida-ne'e ba nivel foun sira susesu nian", dehan Exelénsia Sekretáriu Estadu ESJ-ESTV Sr.Domingos Lopes Lemos.
Governante ne’e hatutan, hein katak ohin sei sai hanesan re-estabelesimentu parseria ida ne'ebé dura no iha befísiu ba nasaun rua ne’e no koñesimentu ne'ebé fahe bele buras hodi fó impaktu pozitivu ba jerasaun sira iha futuru.
Iha fatin hanesan Ministra Conselheira no Enkaregada Negósiu Embaixada Brazil iha Dili, Dra. Rita de Cássia Lott Marques, dehan, hanesan reprezentante Embaixadora Brazil nian atu asina Projetu Pilotu Formasaun Dosente iha Ensinu Sekundariu Tékniku Vokasionál iha Timor-Leste, Projetu pilotu ida-ne'e lista iha área kooperasaun entre Brazil no Timor-Leste.
“Ami fiar katak projetu pilotu ne'e hetan susesu no ami votu sussesu ba projetu ne'e kontinua iha baze ne'ebé luan liu iha tinan oin, no profesór Brazil sira hamutuk ho sira-nia kolega timoroan bele kontribui hodi hametin formasaun profisionál iha Timor-Leste”
Akordu kooperasaun Bilaterál entre Ministériu Edukasaun ho Governu Brazil ne’e asina husi Sua Exelénsia Ministra Edukasaun Dra. Dulce de Jesus Soares no akompaña husi Sua Exelénsia Sekretáriu Estadu ESJ-ESTV Sr.Domingos Lopes Lemos no Dirijente Ministériu Edukasaun nian.
#jornalistarita
#MédiaME
