Dili, Tersa-Feira, 09 Abril 2024
Ministériu Edukasaun reprezenta husi Gabinete Ministra Edukasaun Asesora Marta Ferraz hamutuk ho Ministériu saúde no Xanana Reading Room halo sosializasaun ba komunidade sira kona-ba importánsia lee ba labarik sira iha sede suku Becora.
Iha sosializasaun ne’e Asesora Marta Ferraz hateten, ohin hetan oportunidade husi Xanana Reading Room atu hato’o ba komunidade sira liuliu iha suku Becora nian, hodi fó sai importánsia ba lee. Nune’e lori labarik sira aleinde komprende kona-ba lee, lee iha mós importánsia oioin hanesan dezenvolve memória, tulun armonizasaun moris iha sosiedade, rezolve dezafiu sira ne'ebé labarik bele enfrenta durante tempu infánsia nia to'o sai adultu, hametin relasaun família entre oan no inan-aman, no seluk tan.
“Edukasaun la’os depende ba eskola de’it, maibé tenke iha tempu ida hodi kuda fini ida iha uma laran liuhusi inan-aman sira-nia ajuda ba oan sira tanba bainhira lee bele dezenvolve kakutak no kapasidade sósiu emosionál hodi halo relasaun belun saudavél ho kolega no sosiedade”. Dehan asesora iha sede suku Becora.
Iha fatin hanesan Reprezentante Xanana Reading Room Elias de Jesus dehan, iha sosializasaun ida-ne’e importante tebes ba komunidade sira, tanba sosializasaun kona-ba lee livru la halo beibeik mak kultura lee livru sei menus, tanba ne’e mak Sala Leitura Xanana Gusmão iha inisiativa ida-ne’e hodi fahe nafatin informasaun ba komunidade sira hodi haburas nafatin kultura hadomi lee iha komunidade.
#jornalistaluis
#MédiaME
