Suai: Sábadu, 13 Abríl 2024
Sua Exelénsia Ministra Edukasaun Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos fó pose ba manorin ingresu espesiál no rejime karreira dosente hamutuk na’in-286. Serimónia tomada de posse ne’e realiza iha Postu Administrativu Suai-Vila, Munisípiu Covalima.
Iha diskursu, S.E. Ministra Edukasaun Dra. Dulce de Jesus Soares hateten, Profesór mak sientista, tanba avalia alunu nia progresu no kria ipóteze hodi koko uza métodu ne’ebé sei ajuda nia atu lori alunu ida-idak ba atinje ninia potensiál tomak no sai mós hanesan konselleiru hodi fó kuidadu ba alunu sira ho empatia durante sira-nia tempu di’ak no susar inklui fó motivasaun no enkoraja estudante sira atu aprende hosi sala no estuda ho forsa vontade tomak.
“Ohin loron marka tomada de posse ba daneen iha territóriu tomak, no ha’u sente katak serimónia sira-ne’e sai parte ida hosi ha’u-nia serbisu ne’ebé ha’u gosta loos, tanba fó biban mai ha’u atu hasoru malu ho Ita-Boot sira, ne’ebé mak hanesan forsa traballu importante liu iha ita-nia rain”, dehan S.E. Ministra Edukasaun.
Governante ne’e hatutan, Profesór sira mós espesialista iha ninia área rasik hanesan matemátiku, istoriadór no linguístiku hodi fahe sira-nia matenek ho laran-luak ba jerasaun tuirmai, nune’e sente katak hotu-hotu bele konkorda katak vokasaun profesór nian mak importante duni iha sosiedade nia laran.
Iha fatin hanesan S.E. Sekretáriu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos hateten, manorin sira iha kompeténsia 4 ne'ebé mak sai fundamentu liuliu mak étika profesionál atu bele sai lalenok no modelu ba estudante sira hodi haree no halo tuir.
“Vokasaun sai mestre ne'e atu sai eduka no dedika-an atu transforma ita-nia oan sira, Suai nia oan no Timor oan tomak, husi kakutak ida la hatene sai ba hatene”, dehan S.E. Sekretáriu Estadu.
Enkuantu manorin sira ne’ebé simu pose, husi Ensinu Pré-Eskolár hamutuk na’in-29, Ensinu Báziku hamutuk na’in-194, Ensinu Sekundáriu Jerál hamutuk na’in-41, Ensinu Tékniku Vokasionál 8, Sentru Aprendizajen Informasaun Eskolár hamutuk na’in-12 no Ensinu Rekorrente hamutuk na’in-2, ho totál hamutuk na’in-286.
#jornalistaluis
#MédiaME
