Díli – loron, sábadu 17 agustu 2024
Sua Exelénsia Ministra Edukasaun Dra. Dulce de Jesus Soares hamutuk ho Sua Exelénsia Xefe Estadu-Maior Forsa Armada Timor-Leste, Bigadeiru Jenerél, José da Costa “Trix”, halo palesta aberta ida hodi komemora loron FALINTIL F-FDTL ba dala-49, ne’ebé sei monu iha loron 20 fulan agustu tinan ne’e, hanesan tempu reflesaun no tempu ba mudansa nian. Palestra ne’e realiza iha Auditóriu Kuartel Jeneral F-FDTL.
Iha Palestra ne’e, Sua Exelénsia Ministra Edukasaun Dra. Dulce de Jesus Soares, hateten, importante tebes atu hasoru malu ho na’in ulun sira husi FALINTIL F-FDTL nian atu bele ajuda hodi kuda espíritu nasionalizmu no patriotizmu ba estudante no profesór sira.
“Ami hakarak rona esperiénsia husi na’in ulun sira ne’ebé mak fó ita bo’ot sira-nia vida no servisu iha tempu naruk hodi lori Timor-Leste ba ukun rasik-an, ba ami hanesan ónra no previléziu bo’ot ida mai ami, tanba bele hasoru ita bo’ot sira hodi fahe mai ami nia-oan sira, joven no profesór sira kona-ba prosesu luta to’o ukun rasik-an” dehan Ministra Edukasaun.
Iha fatin hanesan, Sua Exelénsia Xefe Estadu-Maior Forsa Armada Timor-Leste, Bigadeiru Jenerél, José da Costa “Trix”, hateten, objetivu husi selebrasaun loron 20 fulan agustu ne’ebé realiza kada tinan, tanba hakarak relembra fila-fali FALINTIL sira nia luta ba libertasaun rai ida ne’e hodi sai nasaun ida livre, demokrátiku no ukun rasik-an, mak ohin loron ita bolu Repúblika Demokrátika de Timor-Leste.
“Loron 20 agustu, ita komemora tinan-tinan, hahú husi 20 agustu tinan 1975 to’o ohin loron, no ba tinan ida ne’e ita komemora ba dala-49, objetivu husi luta ne’e mak hakarak liberta patria, atu hetan patria tenki konkista no ita konkista tiha ona, tanba ne’e mak ohin loron ita bolu Repúblika Demokrátika de Timor-Leste.
Palestra aberta ne’e mós iha kuis ba estudante sira hodi responde kona-ba istória funu nian no hetan prémiu hanesan kamiza, xapeo, kopu, kantil bee nian no seluk tán.
#MédiaME
