Díli – loron, Domingu, 18 agustu 2024
Sua Exelénsia Ministra Edukasaun Dra. Dulce de Jesus Soares hamutuk ho Xefe Estadu Maior Jenerál FALINTIL F-FDTL, Tenente Jenerál Falur Rate Laek no estudante sira, hala’o marsa saudavel, hahú husi rotunda Saudozu Nicolau Lobato Comoro ba to’o Kuartél Jenerál FALINTIL F-FDTL Fatuhada hodi komemora loron FALINTIL ba dala-49, hodi hanoin hikas fali istória luta Timoroan nian iha tempu pasadu no ohin loron bele hetan ukun rasik-an.
Iha okaziaun ne’e, Sua Exelénsia Ministru Defeza, Dr. Donaciano da Costa Gomes “Pedro Klamar Fuik”, hateten, FALINTIL iha nia ain fatin rasik ne’e halo durante tinan 24, ho sakrifisiu oinoin atu bele alkansa independénsia, libertasaun, identidade nasionál ba Timor-Leste, tanba ne’e ohin selebra fila-fali hafoin hetan independénsia liuhusi luta FALINTIL sira nian, atu bele konkista libertasaun no independénsia ne’ebé iha.
“Tinan oin sei selebra tinan 50 aniversáriu FALINTIL nian, marka jerasaun dala tolu (3) ba istória libertasaun nian, tinan-tinan FALINTIL halo selebrasaun atu bele hanoin hikas valorez hotu-hotu ne’ebé mak aswa’in gloriozus, feto, mane no kombatente sira fó sira-nia-an rasik hodi bele manán ita-nia ukun rasik-an”, dehan Ministru Defeza.
Hafoin marsa to’o iha Kuartél Jenerál FALINTIL F-FDTL Fatuhada, halo mós abertura ofisiál ba atividade feira no konsertu múzika hodi komemora no festeza loron FALINTIL ba dala-49.
#MédiaME
