Dili, sesta-feira, 05 abril 2024
S.E. Ministra Edukasaun Dra. Dulce de Jesus Soares hala’o enkontru kortezia ho Diretór Ezekutivu Sentru Estudu ba Paz no Dezenvolvimentu (CEPAD-sigla lian portugés) Sr. João Boavida hodi esplora kolaborasaun entre Ministériu Edukasaun ho CEPAD hodi bele hola parte ba prosesu revizaun kurrikulár nasionál. Enkontru ne’e hala’o iha Salaun VIP, Ministériu Edukasaun, Vila-Verde.
Iha entrevista, Diretór Ezekutivu CEPAD Sr. João Boavida hateten, ohin kontinuasaun enkontru tinan kotuk nian atu esplora posibilidade hodi integra matéria anti-korrupsaun iha kurríkulu nasionál ba estudante sira atu bele hatoman sira ho prinsípiu no valór sira ne’ebé iha.
“Iha tempu ne’ebá ami hetan kedas aprovasaun naun formál ida husi Sua Exelénsia Ministra, nune’e ohin hetan oportunidade di’ak ida liga ho informasaun ne’ebé ami hetan katak, lakleur tan Ministériu Edukasaun sei halo ona revizaun ba kurríkulu nasionál”, dehan Diretór Ezekutivu CEPAD.
Dirijente CEPAD ne’e hatutan, ohin mai ho kedas parseiru foun ida ne’ebé hetan projetu anti-korrupsaun ida husi USA atu servisu hamutuk fali ho kolaborasaun besik liu ba Ministériu Edukasaun liuhusi Sua Exelénsia Ministra Edukasaun rasik atu oinsá bele integra materiál ne’e iha kurríkulu.
