ME HAMUTUK HO PR NO EMBAIXADÓR NOVA ZELÁNDIA INAGURA FATIN HALIMAR BA PRÉ-ESKOLÁR 20 DE MAIO NATARBORA
Natarbora, 15/11/2023 – Ministra Edukasaun Dra. Dulce de Jesus akompaña Prezidente Repúblika Dr. José Ramos Horta no Embaixadór Nova Zelándia Sr. Philip Hewitt hodi inagura fatin halimar ba labarik sira iha Pré-Eskolár 20 de Maio Natarbora ne’ebé hetan apoiu husi governu Nove Zelándia, kuarta-feira ne’e.
Iha inagurasaun ne’e Prezidente Repúblika Dr. José Ramos Horta hateten, edukasaun no saúde importante liu buat hotu-hotu, tanba la iha nutrisaun la’o ba eskola mós la augenta, nune’e governu tau matan ba merenda eskolár hahú husi pré-eskolár.
“Ha’u rona labarik balun apa ama sira la lori ba eskola, pré- eskolár ne’e importante tebes, bainhira labarik iha tina 4 no 5 bele ba ona eskola hodi halimar, lee no seluk tán”, deha Prezidente Repúblika.
Iha fatin hanesan Ministra Edukasaun Dra. Dulce de Jesus Soares husu ba inan-aman sira hotu atu badinas lori oan sira ba eskola, tanba konseitu husi pré-eskolár mak aprende liuhusi halimar atu iha preparasaun antes hakaat ba klase 1 ensinu báziku.
“Eselénsia Prezidente tau importánsia bo’ot tebe-tebes ba edukasaun husi kedas ita nia oan sira ho tinan 3 ba oin, tanba ne’e apoiu husi governu Nova Zelándia hanesan amigu hodi kria fatin halimar ba oan sira”, dehan Ministra Edukasaun.
Aliende ne’e Embaixadór Nove Zelándia iha Timor-Leste, Sr. Philip Hewitt hateten, Nova Zelándia sente orgullu tebes, tanba bele servisu hamutuk ho governu Timor-Leste hodi harii fatin halimar ba labarik sira hamutuk 123 iha teritóriu laran tomak.
“Programa halimar, aprende no deskobre susesu hahú husi konstrusaun fatin halimar liuhusi kolaborasaun besik ho programa nasionál dezenvolvimentu suku, tanba ne’e prosesu konstrusaun fatin halimar tenki kontinua no eziji programa HANDS hodi identifika mekanizmu foun liuhusi kolabora besik ho komunidade hodi kontinua prosesu konstrusaun”, dehan Embaixadór.
Embaixadór ne’e hatutan, dezenvolvimentu pré-eskolár ne’e importante tebes ba futuru nasaun nian, tanba harii fundasaun ida ne’ebé metin ba dezenvolvimentu labarik nian, tanba ho edukasaun sedu ne’ebé kualidade aas sei promove abilidade koñesimentu sosiál no emosionál hodi lori rezultadu akadémiku ne’ebé di’ak liu.
