Díli, Kinta-Feira, 04 Abril 2024
S.E. Ministra Edukasaun Dra. Dulce de Jesus Soares akompaña husi Prezidente Komisaun Funsaun Públika Sr. Agostinho Letêncio de Deus no Komisáriu Komisaun Funsaun Públika Sr. José Telo hodi observa direta ba kandidatura ne’ebé mak hala’o hela teste eskrita eletróniku ba manorin, iha salaun Komisaun Funsaun Públika, Matadoru.
Iha entrevista, S.E. Ministra Edukasaun Dra. Dulce de Jesus Soares hateten, kandidatu sira barak mak apresia katak prosesu ne’e fó oportunidade ba ema hotu-hotu hanesan no fila-fali ba ema idak-idak hodi prepara sira nia-an.
“Matéria ne’ebé sira dadaun ne’e ezame, matéria ne’e ba aban-bainrua sira atu hanorin no matéria sira ne’e balun mós foti husi matéria sira ne’ebé mak estudante sira mós uza hodi halo ezame, la’os mai husi fatin seluk, maibé uza matéria ne’ebé mak foti husi kuríkulu hanesan baze nasionál iha Timor-Leste”, dehan S.E. Ministra Edukasaun.
Governante ne’e hatutan, importante atu haree katak ema idak-idak iha sira-nia preparasaun ánimu hakarak tuir teste, tanba ne’e, dalan mak Ministériu Edukasaun servisu hamutuk ho Komisaun Funsaun Públika hodi kontinua aposta ba kualidade edukasaun.
#jornalistaluis
#MédiaME
