Atauru – Loron Domingu, 04 Agustu 2024
S.E. Ministra Edukasaun Dra. Dulce de Jesus Soares hamutuk ho S.E. Ministra Solidaridade Sosiál Dra. Verónica das Dores, S.E. Ministra Saúde Dra. Elia Reis Amaral, S.E. Vise-Ministra Asuntu ASEAN Dra. Milena Maria da Costa Rangel no S.E. Vise-Ministra Finansas Dra. Felísia Claudinanda Cruz Carvalho, hala’o vizita ba komunidade Rejiaun Administrativa Espesiál Atauru hodi fahe ai-han komplementár no mós vizita eskola hodi haree direta kondisaun ne’ebé estudante sira hasoru.
Iha vizita ne’e Sua Exelénsia Ministra Edukasaun Dra. Dulce de Jesus Soares, agradese tebes ba lider komunitária, pastór no mós ba inan-aman sira ne’ebé mak fó ona atensaun atu eduka oan-sira, tanba sira mak futuru rai ida ne’e nian.
“Ita prepara sira ho di’ak, aban bainrua sira mak sei lidera fali rai ne’e, depende tebes ba ita hotu atu fó ita-nia domin edukasaun, la’os liu de’it husi lee no hakerek, maibé étika no disiplina importante tebes atu kontinua mantein kultura ne’e iha komunidade nia leet”, dehan S.E. Ministra Edukasaun.
Governante ne’e hatutan, iha situasaun agora presiza tebes lider komunitária, lider relijiozu no inan-aman sira atu tau atensaun ba oan sira, tanba manorin sira de’it lato’o, tanba ne’e presiza ema hotu nia apoiu, atu bele hetan edukasaun ida di’ak ba oan sira-nia futuru.
Remata tiha vizita ne’e, S.E. Ministra Edukasaun Dra. Dulce de Jesus Soares, S.E. Ministra Solidaridade Sosiál Dra. Verónica das Dores, S.E. Ministra Saúde Dra. Elia Reis Amaral, S.E. Vise-Ministra Asuntu ASEAN Dra. Milena Maria da Costa Rangel no S.E. Vise-Ministra Finansas Dra. Felísia Claudinanda Cruz Carvalho, kontinua viajen ba Aldeia Iliduadoru, Suku Biqueli hodi fahe ai-han komplementár ba família kbi’it laek sira.
Remata tiha vizita no fahe ai-han komplementár ba komunidade iha aldeia Iliduadoru Suku Biqueli, kontinua kedas viajen ba Aldeia Arlo Suku Beloi hodi fahe mós ai-han komplementár ba família kbi’it laek sira,hanesan aktu selebrasaun Konsulta Populár Loron 30 fulan agustu ba dala-25 ne’ebé sei mai.
#MédiaME
