Manatuto, loron 09 fulan Jullu tinan 2024- Ministru Edukasaun Interinu Sr. Domingos Lopes Lemos, entrega sertifikadu ba formadór/a kursu língua Portugués nivel B1 no nivel B2 hamutuk na’in atus ida tolu-nulu (130), iha eskola Sekundáriu Jerál Kay Rala Manatuto tersa-feira ne’e.
Iha entrevista, Ministru Edukasaun Interinu Sr. Domingos Lopes Lemos hateten, planu polítika governu nian, mak tenke halo kontinuasaun kapasitasaun ba profesór sira, hodi nune’e bele hasa’e koñesimentu profesór sira-nian di’ak liu iha lian Portugés.
“Ita labele nonok, hotu-hotu tenke esforsa maka’as hodi halo kampaña bo’ot ida ba sidadaun hotu-hotu parte edukasaun nian, atu ita hotu hatene katak, hakarak ka lakohi ita hotu tenke aprende lian Portugés”, dehan Ministreu Edukasaun Interinu.
Fatin hanesan formadora Josefina de Carvalho, agradese tebes ba oportunidade ne’ebé Governu Timor-Leste ho Governu Portugal liuhusi Institutu Camões fó, tanba liuhusi formasaun ida ne’e bele aumenta tan koñesimentu liu-liu iha lian Portugés nune’e bele implementa ba estudante sira.
#MédiaME
