Dili - Kuarta-Feira, 22/05/2024
Ministériu Edukasaun liu husi Diretor Jerál Ensinu Sekundáriu Tekníku Vokasionál Sr. Deolindo da Cruz ho Diretora Institutu Nacional de Mão-de-Obra
(INDMO) Sra. Isabel Fernandes de Lima, reuniaun hamutuk ho komisaun téknika hodi aprezentasaun no halo diskusaun ba despaxu Ministérial konjunta kona-ba implementasaun prosesu akreditasaun no viabilizasaun sistema dupla sertifikadu ba formandu Ensinu Sekundariu Tékniku Vokasionál hodi hetan apresiasaun final, iha salaun konferénsia Ministériu Edukasaun Vila-Verde kuarta-Feira ne'e.
Iha aprezentasaun ne'e, Diretór Jéral Ensinu Sekundáriu Tékniku Vokasionál Sr. Deolindo da Cruz hateten, Despaxu Ministérial konjuntu ne'e hanesan instrumentu legál ba implementasaun atribuisaun dupla sertifikasaun ba formandu ESTV iha futuru.
Fatin hanesan, Diretora Ezekutivu INDMO Sra. Isabel Fernandes de Lima, aseita draf despaxu konjunta ne’ebé Ministériu Edukasaun aprezenta no konkorda ho ajustamentu ne’ebé halo ba estrutura komisaun téknika ho nune’e bele fasilita di'ak liu tan servisu sira iha futuru.
Enkuantu, liu husi asaun ne’ebé Ministériu Edukasaun ho INDMO halo despaxu konjuntu refere sei tulun estudante tékniku Vokasionál sira no fasil hasoru merkadu traballu ho dedikadu no responsabllidade.
Nune’e mos, iha reuniaun komisaun téknika ne’e, parte Ministériu Edukasaun ho INDMO konkorda atu halo ajustamentu ba estrutura komisaun téknika, nune’e, parte ME no INDMO bele haree ida-idak nia responsabilidade, kompeténsia hodi dezempeña di'ak liu tan funsaun iha implementasaun dupla sertifikasaun ESTV ida ne’e.
Reuniaun hamutuk komisaun téknika ne’e, hatudu partisipasaun ativu husi membru sira no iha diskusaun refere komisaun haree katak konteúdu sira husi draf despaxu Ministérial konjuntu reflete intensaun governu nian liga ho planu estratejiku dezenvolvimentu nasionál 2011-2030, Polítika Programa Ministériu Edukasaun nian inklui Instituto Nacional de Desenvolvimento Mão-de-Obra,( INDMO).
#MédiaME
