WHO ENTREGA EKIPAMENTU DASI TETU TODAN NO SUKAT AS UNIDADE 140 BA ME
Dili, 21/11/2023- Organizasaun Saúde mundiál (WHO) entrega ona ekipamentu dasi tetu todan no sukat hamutuk unidade 140 ba Ministeriu Edukasaun hodi fó tulun ba estudante sira.
Iha diskursu exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos deklara, Oportunidade di'ak ne'ebé mak ohin loron hamutuk iha fatin ida ne’e, WHO mai ho komitmentu ida di'ak, hanoin ida di'ak, hodi fó tulun Ministériu Edukasaun liuliu ba eskola sira liu husi meius ida ne'ebé iha.
"Agradese tebestebes ba organizasaun saúde mundiál, maski ajuda sira ne'ebé mak iha, lakeleur ita sei transfere ba eskola sira atu utiliza ekipamentu sira ne'e", deklara exelénsia ne'e, Husi ekipamentus hirak ne'e ita tetu tok , estudante sira todan, tanba nutrisaun ladi'ak mak impaktu bo'ot ba estudante sira akapta materia ne'e mós posivel ituan.
Governante ne'e hateten, Governu Timor Leste halo investimentu bo'ot liuliu ba iha merenda Eskolár ba eskola sira hotu.
"Husi ekipamentu hirak ne'e fó han labarik sira maibé lahatene andamentu labarik sira nian durante periódu ida, nia han maibé lahatene nia saúde ne'e oinsá, krekas tan mak iha ou nia bokur demais liu, maibé ho ekipamentu hirak ne'e ita bele hatene bele ona sukat tetu, labarik sira nia han ho grama hira kada refisaun ida, ho meiu ida ne'e ita bele halo estimasaun di'ak liu tan".
Governante ne'e hateten, Ministériu Edukasaun nian naran agradese ba kontribuisaun ne'ebé mak WHO fó, espera katak ho meiu sira ne'e hotu bele apoiu estudante sira iha Timor leste.
Iha fatin hanesan Representate Organizasaun Saúde Mundiál iha Timor Leste Sr. Arvind Mathur dehan, Informasaun ne'e laos de'it atu ajuda identifika deznutrisaun entre labarik sira, maibé mos prova ona katak ne'e valioza iha identifikasaun pezu eksesu no obesidade entre labarik sira.
"Edukasaun no Sistema saúde tenke prioritiza saúde no bein estar estudante, pesoål, no komunidade sira. Eskola iha kna'ar imprtante ba promove saúde, bein-estar, no dezenvolvimentu labarik no adolesente sira nian, ida ne'e direitu inerent/esensiál no fundamental ba labarik sira atu hetan edukasaun no saúdavel. Ha'u sente ita-boot sira bele konkorda ho ha'u katak edukasaun no Saúde ne'e buat rua ne'ebé interligada, Saúde ne'ebé ladi'ak sei kauza rezultadu edukasaun ne'ebé ladi'ak no edukasaun ne'ebé menus sei limite oportunidade ba saúde ne'ebe di'ak liu". Katak reprezentante WHO ne'e
Reprezentante WHO ne'e afirma, Instrumentu hirak ne'e hodi fasilita no suporta monitor kresimentu estudante sira nian no sei ajuda atu identifika problema saúde ruma, fornese entendimentu ba estadu nutrisional, ajuda monitor marka dezenvolvimentu no pontu kontaktu hirak ne'e bele uza hodi avalia bein-estar labarik sira nian bele fasilita inan-aman nia envolvimentu no sensibilizasaun.
"Ferramenta hirak ne'e, ita bele garantia katak labarik sira sei simu apoiu nutrisional ne'ebé nesesáriu, hanesan akonsellamentu nutrisional ka alimentasaun suplementar, no sei kontribui ba futuru labarik Timor Leste nian ne'ebé saúdavel no naroman liu".
