Ainaro, 12 fulan Novembru 2024
Sua Exelénsia Sekretáriu Estadu Ensinu Sekundariu Jerál no Ensinu Sekundáriu Tékniku Vokasionál Sr.Domingos Lopes Lemos ho dirijentes Ministériu Edukasaun nian komemora loron Masakre Santa Kruz 1991 ba dala-33 no selebrasaun loron nasionál juventude ba dala-19 iha kampu futebol Munisípiu Ainaro tersa-feira ne’e.
Iha Diskursu Sua Exelénsia Sekretáriu ESJ-ESTV.Domingos Lopes Lemos hateten, masakre santa kruz hanesan momentu ida ho moras ne’ebé maka’as tebes, maibé mós ho aten-brani ne’ebé labele deskreve no loron nasionál juventude ida-ne’e, selebra forsa no vitalidade foin-sa’e nian ne’ebé sai nu’udar apoiu prinsipál ba nasaun.
“ita-nia orgullu ba ita-nia istória la’ós de’it momentu sira vitória nian, maibé mós iha adversidade sira ne’ebé ita ultrapasa hamutuk, dezafiu ida-idak ne’ebé hasoru, obstákulu ida-idak ne’ebé ultrapasa ona, hametin ita-nia karakter no determinasaun”, dehan Governante ne’e.
Governante ne’e hateten tan, ohin hanoin hikas momentu sira ne’e la’ós ho tristeza, maibé ho orgullu no gratidaun hodi rekoñese dalan todan ne’ebé foti no aten-brani, tenke kontinua dezenvolve nasaun, harii iha fundasaun ne’ebé bei’ala sira tau, devér no responsabilidade atu haburas dame, promove edukasaun, enkoraja inovasaun no asegura sidadaun ida-idak iha oportunidade xave ba futuru mak Timor oan hotu-hotu tenke unidade no kolaborasaun.
Hafoin hala’o atividade iha kampu futebol Ainaro Sua Exelénsia ho dirijentes Ministériu Edukasaun nian partisipa misa komemorasaun loron Masakre Santa Kruz 1991 ba dala-33 no selebrasaun loron nasionál juventude ba dala-19 iha igreja Parokia Nossa Senhora de Fátima Ainaro no kontinua ba tau ai-funan iha monumentu Eulália de Jesus Araújo.
#MédiaME
