Bobonaro - 04/11/2024
Sua Exelénsia Sekretáriu Estadu ESJ-ESTV Sr.Domingos Lopes Lemos hamutuk ho Prezidente INFORDEPE Sr. Domingos Martins, Diretór Nasionál Ensinu Sekundáriu Jerál Sr. Benjamin Fernandes no Diretór Nasionál Ensinu Tékniku Vokasionál Sr. Fernando Moujinho Gama hala'o abertura formasaun espesializada ba dirijente eskola na'in 190 Munisípiu Bobonaro, iha Salaun Ginazio Maliana Segunda-Feira ne'e.
Iha Diskursu Sua Exelénsia Sekretáriu Estadu ESJ-ESTV Sr. Domingos Lopes Lemos hateten, loron ohin ita hahú atividade ida-ne’ebé importante no nesesáriu atu hadi’a edukasaun iha ita-nia rain, no formasaun espesializada ne’e la’ós de’it oportunidade ida atu hasa’e abilidade no hetan koñesimentu foun kona-ba jestaun no administrasaun eskolár, maibé mós momentu ida atu reflete kona-bá papél fundamentál ne’ebé ita-boot ida-idak hala’o iha formasaun jerasaun futuru nian.
"Tanbá ne'e Treinamentu ida-ne'e planeia ona ho kuidadu atu fornese ba ita-boot sira ferramenta no estratéjia sira ne'ebé nesesáriu atu hasoru dezafiu sira-ne'e ho efetivu no inovativu ba jestaun eskola nian. Iha formasaun ne’e nia laran tomak, ita-boot sira sei iha oportunidade atu aprende husi formadór INFORDEPE sira, troka esperiénsia ho kolega sira no dezenvolve aprosimasaun foun ba jestaun eskola nian.
Governante ne'e fó hanoin tan, ba líder eskola foun sira, dezeja ba imi hotu viajen aprendizajen ida ne'ebé riku no inspiradór, hodi ita-boot sira sai husi formasaun ida-ne'e ho preparadu liután, motivadu liután ho konviksaun katak ita-boot sira bele halo diferensa iha eskola ida-idak, no sai lideransa edukasionál la'ós de'it kona-ba jere, maibé sai inspiradór hodi orienta ita-boot nia ekipa sira ba susesu
#MédiaME.
