Díli – Loron Segunda-Feira, 04 Outubru 2024
Sua Exelénsia Ministra Edukasaun Dra. Dulce de Jesus Soares hala’o enkontru ho Konsellu Británika- ASEAN UK SAGE, ne’ebé hola parte iha Ministériu Edukasaun Sudoeste Asiátiku hodi diskuti kona-ba programa tolu importante ne’ebé atu realiza iha Timor-Leste.
Iha entrevista, Sua Exelénsia Ministra Edukasaun Dra. Dulce de Jesus Soares, hateten, Ministériu Edukasaun Britániku, hakarak fó apoiu mai Timor-Leste liuhusi programa pilár tolu, hanesan reforsa fila-fali literasia no numerasia baze ba estudante sira iha ensinu báziku, asesu ba labarik feto sira ne’ebé karik la kontinua ona sira-nia estudu no literasia dijitál ba joven sira ligasaun ho servisu.
“Kooperasaun ne’ebé Ministériu Edukasaun Timor-Leste sei halo ho Konselu Británika, mak haruka ona proposta ida hodi realiza workshop ida ho dirjente sira Ministériu Edukasaun nian kona-ba área sira ne’ebé relevante”, dehan ME.
Governante ne’e hatutan, servisu ida ne’e halo iha nasaun Cambodia, Laos no Timor-Leste no sei iha espesie agrupamentu iha nasaun tolu ne’e mak atu estuda hamutuk hodi haree oinsá mak bele aplika didi’ak maneira sira ne’ebé iha atu ajuda reforsa liután estudante sira-nia prosesu aprendizajen.
Iha fatin hanesan, Diretór Programa Konsellu Británika, John Arnold Siena, hateten, ohin halo enkontru ho Sua Exelénsia Ministra Edukasaun hodi diskuti kona-ba programa tolu, hanesan reforsa literasia no numerasia baze ba ensinu báziku, eskola auto ba labarik no feto sira ne’ebé la kontinua eskola no mós literasia dijitál ba joven sira ligasaun ho servisu.
#MédiaME
