SEKRETÁRIU ESTADU ESG NO ESTV SAI INSPEKTÓR BA SERIMÓNIA ISÁR BANDEIRA RDTL

Díli Segunda Feira, 05/02/2024 - Sekretáriu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos Hamutuk ho Direjente Ministériu Edukasaun no funsionáriu tomak hala'o serimónia isár bandeira RDTL iha resintu Ministériu edukasaun Vila-Verde.

Iha diskursu, Sekretáriu Estadu ESG no ESTV Sr. Domingos Lopes Lemos hateten, funsionáriu Ministériu Edukasaun tenki hatudu étika no responsabilidade hanesan funsionáriu públiku no manorin hodi hatudu nafatin profesionalizmu no dedikasaun hodi bele lori dezenvolvimentu edukasaun ida ne'ebé di'ak liu ba oan sira.

"Hakarak apela ba maluk funsionáriu sira hotu, atu nafatin hatudu imi nia profesionalizmu, dedikasaun, responsabilidade, dignidade no tenki sente ida de'it iha Ministériu Edukasaun", dehan Sekretáriu Estadu.

Governante ne’e hatutan, hanesan servidór públiku, iha dever no obrigasaun atu atua ho integridade, trasparánsia nomós responsabilidade. Espesiál liu ba profesór no profesora sira ne'ebé iha papél importante iha formasaun ba labarik no joven sira, tenki hatudu postura etika mak hanesan baze fundamentál ba susesu alunu sira nian.