SEKRETÁRIU ESTADU ENSINU SEKUNDÁRIU JERÁL NO ENSINU TÉKNIKU VOKASIONÁL FO POSSE BA VISE PREZIDENTE INFORDEPE.
Dili- Sesta, 25-08-2023, Sekretáriu Estadu Ensinu Sekundáriu Gerál no Ensinu Tékniku Vokasionál Sr. Domingos Lopes Lemos fó posse ba Vice Prezidente Institutu Nasionál Formasaun Dosente Profesionál Edukasaun (INFORDEPE) na'in tolu iha salaun Ian-Martin INFORDEPE Matadoru.
Iha diskursu Sekretáriu Estadu Ensinu Sekundáriu Géral no Ensinu Tékniku Vokasionál Sr. Domingos Lopes Lemos deklara ba emposado/a sira atu juramentu ne'ebé mak halo sai hanesan bukae ida no hanesan mós komprimísiu ba mandatu durante tinan ha'at nia laran.
"Knaar ne'ebé mak ita-boot sira hetan ne'e povu nian, tinan haat remata ita bo'ot sira rai hela kargu ida ne'e ba sira seluk, tanba ne'e husu ita bo'ot sira ne'ebé mak ohin sai sasin atu nune'e bele dezenpeña ita bo'ot sira nia servisu la'o tuir orientasaun, hala'o funsaun ho di’ak ho susesu nune'e bele lori Ministériu Edukasaun liu-liu formasaun profesór sira la'o di'ak iha futuru", dehan eselénsia ne'e.
Iha fatin hanesan representante Emposado/a Vise Prezidente Asuntu Formasaun Profesionál INFORDEPE Verónica Moreira Correia hateten, emposado/a seida'uk iha programa foun sei kontinua nafatin programa oitavu governu nian, ne'ebé estrutura sesante hatúr tiha ona iha programa anuál, kontinua hala'o ida ne'e depois mak hala'o fali planu foun.
"Planu foun 2024 nian mak planu ne'ebé hatúr ona iha Ministériu Edukasaun nian liu-liu programa ida kona-ba dijitaliza formasaun sira, ami sei hakas-an atu bele dizitaliza formasaun sira ho kbi'it ne'ebé ami iha, ami mós sei buka atu koopera ho parseiru dezenvolvimentu sira hodi apoiu ba iha dijitalizasaun nian, nune'e bele utiliza teknolójia iha formasaun sira", katak emposada ne'e.
Enkuantu emposado/a ne'ebé mak hanesan, Verónica Moreira Correia hanesan Vise Prezidente Setór Formasaun Profesionál Kontinua INFORDEPE, Sebastião de Oliveira hanesan Vise Prezidente Setór Peskiza Dezenvolvimentu Avaliasaun Monitorizasaun INFORDEPE no Maria Madalena Lopes hanesan Vise Prezidente Setór Akadémika INFORDEPE.
