Díli, loron kuarta-feira, 03 Abril 2024, Sua Exelénsia Ministra Edukasaun, Dra. Dulce de Jesus Soares ho membru Governu Konstitusionál dasiak partisipa iha lansamentu programa Futuru Líder Ba Asean (FLBA) nian ne’ebé lansa diretamente husi Sua Exelénsia Primeiru Ministru Kay Rala Xanana Gusmão no Sekretáriu Jerál ASEAN Kao Kim Houm iha salaun GMNTV Bebora.
Hafoin lansamentu, Sua Exelénsia Vise-Ministra ba Asuntu ASEAN Sra. Milena da Costa Rangel hateten, atividade ohin hanesan preparasaun ida atu kria futuru líder Timor-Leste nian, tanba Timor-Leste iha prosesu adezaun ba ASEAN mak uza momentu ida-ne’e atu prepara duni rekursu humanu atu nune’e bele asegura integrasaun rejionál.
“Programa ne’e importante tebetebes ba nonu governu konstitusionál hodi halo investimentu kapitál umanu ba futuru líder sira hodi responde ba ajenda dezenvolvimentu nasionál no tékniku rejionál nian”, dehan Governante ne’e.
Partisipante ba programa ne’e hamutuk ema na’in-100, maibé sei nafatin kontinua programa ne’e ba tinan sira tuirmai.
#jornalistaluis
#MédiaME
