MINISTRA EDUKASAUN PARTISIPA MISA ANIVERSÁRIU ENSINU PRE-ESKOLÁR NO BÁZIKU ESKOLA KATÓLIKA MARIA AUXILIADORA COMORO BA DALA 25
Dili, 02/09/2023 - Ministra Edukasaun Dra. Dulce de Jesus Soares akompaña husi Xefe Gabinete Ministériu Edukasaun Sra. Paula De Corte Real Araújo partisipa iha misa aniversáriu Ensinu Pre-Eskolár no Báziku iha Eskola Katólika Maria Auxiliadora Comoro ba dala ruanulu resin lima (25), iha Parókia Maria Auxiliadora Comoro.
Hafoin remata misa, Ministra Edukasaun Dra. Dulce de Jesus Soares agradese ba kongregasaun Saleziana ne'ebé dedika sira-nia an tomak no konsege loke eskola hodi tau matan ba timoroan sira ne'ebé mai eskola iha-ne'e.
"Edukasaun iha Timor-Leste mai husi Amu ho Madre sira-nia liman, tanba ne’e inan-aman sira no ita hotu mai hamutuk hodi basa liman ba madre sira, liuliu ba kongregasaun Saleziana ne'ebé halo nia kna'ar boot tebes iha rai ne'e ba ita-nia fiar no eduka ita-nia oan sira", dehan Ministra.
Governante ne’e hatutan estudante sira-nia kontribuisaun ba igreija no ukun rasik-an ida-ne’e mak estuda hodi sai joven ne'ebé iha komportamentu di'ak ba família, komunidade nomós ba igreja.
Aleinde ne'e Ministra Edukasaun mós fó mensajen katak estudante mak futuru husi rai ida-ne'e, tanba ne’e tenke estuda hodi sai matenek, la'os iha valór de'it, maibé iha mós prátika hodi sai povu no sarani ne'ebé di'ak ba uma kreda no nasaun.
Hafoin remata misa, Ministra Edukasaun mós hala'o vizita bá pintura iha muru Eskola Katólika Maria Auxiliadora Comoro nian ne'ebé pinta liuhusi estudante sira-nia liman.
