MINISTRA EDUKASAUN HALA’O VIZITA BA PRÉ-ESKOLÁR MORIS FOUN II LESIBUTAK ANTES BA SERVISU
Dili, 04/09/2023 – Ministra Edukasaun Dra. Dulce de Jesus Soares hala’o vizita ba Pré-Eskolár Moris Foun II Lesibutak, Manleuana hodi haree direta kondisaun ne’ebé estudante sira enfrenta, hafoin ba nia kna’ar fatin Ministériu Edukasaun Vila-Verde.
Iha vizita ne’e Ministra Edukasaun Dra. Dulce de Jesus Soares hateten, kontenti tebes mai vizita Pré-Eskolár ne’e hodi halo teste ba literasia baze estudante sira nian atu bele hatene kona-ba kualidade aprendijazen ne’ebé la’o kada loron.
“Dader antes ha’u ba servisu hakarak liuhusi eskola ne’e atu haree sira nia prosesu aprendijazen, vizita sira ne’e halo simplesmente hakarak tama ba sala aula atu haree katak estudante sira aprende tuir duni kuríkulu ne’ebé iha”, dehan Ministra.
Iha biban ne’e mós Ministra Edukasaun husu ba inan-aman sira atu koopera ho profesór/a sira hodi bele kontinua fó apoiu ba oan sira ne’ebé eskola iha Pré-Eskolár Moris Foun II, tanba Pré-Eskolár importante tebes hanesan baze ba dezenvolvimentu prosesu aprendijazen estudante sira nian iha tempu tuir mai.
Enkuantu totál estudante iha Pré-Eskolár Moris Foun II Lesibutak hamutuk na'in 180 ho Profesór/a hamutuk na’in 4 inklui permanente na’in ida (1), kontratadu na’in rua (2) no voluntáriu na’in ida (1).
