Díli – Segunda-Feira, 08 Abríl 2024
Ministériu Edukasaun liuhusi Xefe Gabinete Ministra Sra. Paula F. da S. Corte Real Araújo, Koordenadora Gabinete Ministra Sra. Benedita Martins, Asesór Kurríkulu Sr. Pedro Ribeiro Gonçalves nomós Sra. Albertina Martins, hamutuk ho Koordenadór Eskola CAFE no ESG 4 de Setembru UNAMET hanesan eskola amiga CPLP nian, hodi halo lansamentu ba konkursu hakerek kreativa hodi selebra loron Mundiál Lian Portugeza.
Iha lansamentu ne’e, Xefe Gabinete Ministra Sra. Paula F. da S. Corte Real Araújo, hateten agora dadaun ne’e Eskola CAFE no ESG 4 de Setembru UNAMET mak sai hanesan pilotu no husu ba estudante sira atu iha korajen hodi bele kompete ba konkursu hakerek kreativa, nune’e bele selebra loron Mundiál Lian Portugueza.
“Rekomenda ba estudante sira katak sira-nia esforsu no vontade atu kompete ba iha konkursu ne’e, hodi bele foti eskola ne’e ninia imajen. Aleinde liuhusi konkursu hakerek kreativa ita bele koñese ona alunu sira ne’ebé iha koñesementu di’ak, nune’e ba futuru bele kapasita sira”. Dehan Xefe Gabinete Ministra.
Enkunatu, konkursu hakerek kreativa ne’e partisipa husi estudante hamutuk na’in ruanulu resin rua (22), husi Eskola CAFE na’in sanulu resin lima (15) no Eskola Ensinu Sekundária Jerál 4 de Setembru UNAMET na’in hitu (7), data limiti ba konkursu refere sei termina iha loron 15 fulan abril tinan 2024.
#MédiaME
