Bobonaro 12 Janeiru 2023 (SAPIENTIA)-Ministru Edukasaun, Juventude no Desportu (MEJD), Armindo Maia, akompana husi Vise Ministru Administrasaun Estatal, Lino de Jesus Torrezao, observa direta kondisaun eskola Ensinu Baziku Sentral, Bere-Mau iha Suku Tapo-Memo, Postu Administrativu Maliana, Munisipiu Bobonaro.
Iha observasaun durante oras ida, ne’e akompana hsoi presidente Autoridade Munisipiu Bobonaro, Ernesto de Oliveira Barreto.
Ministru Armindo haree ho matan kona-ba kondisaun infraestrutura eskola sira hanesan meza ho kadeira no sala aula balun didin ho piku no janela hahu nakles.
Nune’e mos sala tolu konstrui liu hosi projeitu pakote referendum (PPR) ne’ebe didin deit ho bebak no dadaun ne’e nia kondisaun ladun diak ona.
“Aponta hela ba depois mak ita haree took halo nusa, karik bele problema kiik sira-ne’e imi uza osan konsensoens eskolar nian hadia ne’e la boot ida, la presiza hein nasional,” Ministru Armindo, koalia durante halo observasaun ba kondisaun eskola refere, iha Tapo-Memo.
Adjuntu Diretor EBC Bere-Mau, Crisyanto do Nascimento, esplika eskola ne’e enfrenta problema sala aula balu kondisaun la diak, meza no konsidera la sufisiente.
“sala aula tolu ida iha sorin ne’e, estudante setimu ho oitavu mak atu uza, maibe udan estudante sira la tur ladia’ak, ami sai fali, kona-ba karteira eskolar foin dadaun ami mos hatana proposta hotu, maibe la simu,” Adjuntu-diretor EDC ne’e informa ba Ministru Armindo Maia.
Total estudante EBC Bere-Mau iha sala aula akumula estudante hosi primeiru -ano ho terseiru siklu hamutuk ema na’in-690 no profesor hamutuk ema na’in 19 kompostu hosi permanente no kontratadu.
Media. Sapientia. Bosco
