Liquisa, 12 Julho 2022, (Sapientia)-S.E. Ministru Edukasaun, Juventude no Desportu (MEJD) Dr. Armindo Maia hamutuk ho Reprezentante Embaixada Australia Sra. Rebecca inaugura edifísiu foun Pré-Eskolár Di'ak Timor Fahite, Tibar, Liquisa.
Edifísiu foun ne'e hari'i husi grupo voluntáriu Educate The Future (EFT) Austràlia ho totál montante orsamentu 133.366.00 U$. Sala rua ba alunu sira no ida ba manorin sira. Sei uza husi total estudante 41 no manorin feto na'in 2.
Iha serimónia ne'e, S.E. Ministru-MEJD, Dr. Armindo Maia hateten "Hodi Governu nia naran liu-husi MEJD, agradese ba ETF no ekipa tomak, Pré-eskolár ne'e importante tanba sira iha kapasidade aprende ho lais wainhira hakat ba ensinu baziku. Governu mós esforsu, nune'e kuaze 28% labarik Timor Laran asesu ona Pré-Eskolár"
Nia hatutan, "Husu inan aman no entidade eskola atu responsabiliza no kuída edifísiu foun ne'e, atu bele sai fatin ne'ebé eduka labarik sira"
Nune'e mós Reprezentante Embaixada Australia, Sra. Rebecca espresa "Parabens ba entidade hotu nia kontribuisaun, atu dezenvolvimentu nasaun ne'e la'o ho di'ak liu tan, presiza ita hotu nia kontribuisaun ne'ebé di'ak"
Iha tempu hanesan, Diretór programa ETF Australia, Adam Hegedus realsa, "Agradese ba entidade hotu nia kolaborasaun, Importante los atu tau prioridade ba labarik sira no ami hakarak servisu ho MEJD atu implementa iha kada munisípiu"
Iha bibán ne'e, Xefe suko Tibar, Sr. Bento da Conceição relata "Hafoin remata 2° Siklu, labarik sira tenki ba kontinua eskola iha suko seluk, Suku Tibar iha Ensinu Báziku 3° Siklu ida deit nune'e husu MEJD atensaun ba preokupasaun ne'e"
Iha fatin hanesan, Koordenadór Nasionál Programa ETF, Sr. Camilo Fátima dehan "Agradese ba komunidade nia kolaborasaun hodi bele finaliza serbisu ne'e ho di'ak, obra ida-ne'e sei kontinua ba nafatin, tanba kualidade edukasaun la hare'e de'it ba manorin maibé mós edifísiu".
Média - GPCC. MEJD-Bosco
