Oe-Cusse, Loron, 20 Maio 2024
Ministériu Eduksaun liuhusi INFORDEPE, akompaña husi Asesora Jacinta Hanjam Corbafo no Asesora Rosa Soares inklui ekipa Gabinete Ministra Edukasaun partisipa feira livru iha ámbitu Komemorasaun Loron Restaurasaun Independénsia ba dala XXII iha Lifau Oe-Cusse.
Iha entrevista Vise-Prezidente INFORDEPE, Sra. Maria Madalena Lopes hateten, feira ida ne’e husi RAEOA mak organiza, maibé Ministériu Edukasaun hetan konvite atu mai suporta hodi realiza feira livru refere, nune’e parte Ministériu nian lori livru sira husi nível Pré-Eskolár to’o nível Ensinu Sekundáriu atu konvida estudante sira mai halo leitura.
“Programa ida ne’e husi Sua Exelénsia Prezidente Repúblika, nune’e ita hotu koopera atu bele hala’o programa ida ne’e ba oin, iha programa ne’e rasik ami mós aprezenta jogu no kuiz ruma atu hakle’an sira nia koñesimentu kona-ba matéria ne’ebé husu relasiona ho sira nia estudu”, dehan Vise- Prezidente INFORDEPE.
Iha fatin hanesan, Estudante husi ESTV Palaban, Maria Angelina Neno hateten, fatin feira livru ida ne’e di’ak tebes ba ami estudante sira, tanba bele aprende liután husi livru sira ne’ebé iha atu bele hasa’e koñesimentu kona-ba siénsia, matemátika, Lian Portugés no seluk tan.
“Ami estudante sira mai haree feira livru ida ne’e kontente tebes, tanba bele lee livru sira hodi bele koñese di’ak liután mundu”, dehan Estudante ESTV Palaban.
#jornalistaluis
#MédiaME
