Ermera, 08/08/2024
Sua Exelénsia Ministra Edukasaun Dra. Dulce de Jesus Soares hamutuk ho Prezidente Autoridade Munisípiu Ermera Sr. José Martinho dos Santos Soares hala’o enkontru ho autoridade relizioju no dirijente sira servisu munisípiu nian hodi ko’alia kona-ba preparasaun sarani Vigararia Ermera nian atu partisipa iha misa Sua Santidade Papa Francisco iha Tasi-3, Dili.
Iha enkotru ne’e Sua Exelénsia Ministra Edukasaun Dra. Dulce de Jesus Soares hateten, ohin mai enkontru ho autoridade munisípiu no dirijente sira tomak hanesan membru governu ne’ebé mak destaka mai iha Munisípiu Ermera ne’e, hodi fó apoiu ba komisaun kona-ba vizita Sua Santidade Papa Francisco mai iha Timor-Leste.
“Ita tenke ko’alia ba malu husi parte igreija, parte governu no parte seguransa nian, atu garante katak ita-nia maluk sarani sira hotu ne’ebé mak husi Ermera, sai husi sira-nia uma mai to’o iha sira-nia parókia no mai to’o fali iha Gleno no lori malu tun to’o ba iha Tibar, la’o ho di’ak to’o ba asiste misa iha Tasitolu ho di’ak to’o hotu-hotu fila-fali mai ho di’ak nafatin”, dehan S.E. Ministra Edukasaun.
Alíende ne’e Prezidente Autoridade Munisípiu Ermera Sr. José Martinho dos Santos Soares mós informa, oportunidade ida ne’e atu distribui mós orsamentu ne’ebé hetan husi nasionál ho montante dolár amerikanu $40.000.00 ba Munisípiu Ermera no Postu-Administrativu ida sei hetan dolár amerikanu $5000.00 hodi organiza hahán no konbustível ba transporte.
Enkotru ne’e partisipa husi, Padre Vigáriu Forraniu Vigararia Ermera Pe. Ricardino C. Mendonça, Komandante PNTL ho membru sira, Komandante F-FDTL ho membru sira, Amu Pároku sira, Administradór Postu-Administrativa sira, Prezidente CCI Munisípiu Ermera no dirijente sira servisu munisípiu nian inklui autoridade relijiozu sira.
#Média ME
