Ermera – Segunda-Feira, 24 Juñu 2024
Sua Exelénsia Prezidente Repúblika Dr. José Ramos-Horta akompaña husi Sua Exelénsia Ministra Edukasaun Dra. Dulce de Jesus Soares, Vise Ministru Administrasaun Estatal Sr. Jacinto Rigoberto, hala’o vizita ba Eskola Sekundária Tékniku Vokasionál Dr. José Ramos-Horta Calbale-Lauana hodi halo diálogu ho komunidade inklui fahe ai-han ba komunidade kbi’it laek sira.
Iha diskusaun ne’e, Sua Exelénsia Ministra Edukasaun Dra. Dulce de Jesus Soares hateten, tuir loloos iha eskola ida ne’e tenki iha rampa hodi fó asesu ba estudante sira ho kondisaun difisiente, tanba ne’e iha konstrusaun tuir mai ne’e Ministériu Edukasaun iha fatin barak mak hahú ona tau rampa nomós haka’as-an atu bele tau mós iha sintina sira atu bele asesivel ba maluk sira ho nesesidade espesiál.
“Ministériu Edukasaun iha mós Diresaun Nasionál Inkluzivu ne’ebé mak tau matan ba maluk sira ho kondisaun difisiente, iha iha sentru ba ema ho difisiente infelizmente foin iha munisípiu tolu (3) de’it, tanba atu hetan ema ne’ebé iha kapasidade atu hanorin brile nemós la iha ema barak mak hatene ida ne’e, maibé neneik ita sei tau ekipamentu sira atu bele apoiu”, dehan Ministra Edukasaun.
Hafoin remata diskusaun, Sua Exelénsia Ministra Edukasaun Dra. Dulce de Jesus Soares hamutuk ho Sua Exelénsia Prezidente Repúblika Dr. José Ramos-Horta no Vise Ministru Administrasaun Estatal Sr. Jacinto Rigoberto inklui Autoridade Munisísipiu, Postu Administrativu no Autoridade Lokál sira fahe ai-han nesesidade báziku ba komunidade kbi’it laek sira.
#MédiaME
