Díli – kinta-feira, 18 abríl 2024
Sua Exelénsia Ministra Edukasaun Dra. Dulce de Jesus Soares hamutuk ho Prezidente Repúblika Dr. José Ramos Horta, halo lansamentu ba sosializasaun programa Edukasaun Multilinge ho tema lahó lian ema labele komunika no kompriende malu; Ema labele partilla ka espresa sira nian hanoin no aspirasaun. Lansamentu ne’e realiza iha Salaun Ian Martin INFORDEPE.
Iha lansamentu ne’e, Prezidente Repúblika Dr. José Ramos Horta hateten, governu tenki garante kualidade formasaun ba manorin sira, fó insentitivu oin-oin, infraestrutura, ne’ebé lalika halo uma bo’ot, importante mak kompleta ho bee mós, sintina ba feto no mane, sala reuniaun ba manorin sira mak prioridade absoluta ba nasaun ida.
“Parabens ba Dra. Dulce Ministra Edukasun ba inisiativa ida ne’e husu atu kontinua projetu pilotu ida ne’e, interesante no ita salva lian materna hodi fó aproveitamentu di’ak liu ba labarik sira no ba oin Timor-Leste bele sai nasaun ida poliglota no ema hotu-hotu sei hakfodak, tanba rai ida ki’ik, maibé iha lian oin-oin”, dehan Prezidente Repúblika.
Xefe estadu ne’e akresenta, la iha debate ba metodolojia ida ne’e no fó parabens ba esforsu ida ne’e, tanba bele hahú prosesu ne’e hamutuk ho Ministra Edukasaun Dra. Dulce de Jesus Soares hanesan ema tékniku ida iha área edukasaun, ho Ministra nia lideransa bele iha formasaun téknika, sientífika no pedagojia barak liután ba manorin sira, tanba sira mak tau matan ba labarik sira.
Iha fatin hanesan, S.E Ministra Edukasaun Dra. Dulce de Jesus Soares hateten, objetivu husi programa EMULI ne’e bazeia ba estudu ne’ebé iha, bainhira labarik ida bele aprende ho lian ida ne’ebé mak nia lahatene, uza lian materna ne’ebé iha hodi aprende numerasia no literasia antes hakat ba segunda ka terseira língua.
“Iha ita-nia rai liu-liu ba estudante sira ne’ebé iha área remota sira ne’ebé balun seidauk hatene lian Tetun no Portugés ita ajuda literasia no numerasia iha sira nia lian-inan hafoin hakat ba lian-ofisiál sira, atu bele fó fundasaun ida di’ak liu ba estudante sira iha prosesu tomak aprendizajen nian”, dehan Ministra Edukasaun.
Governante ne’e hatutan, husi tinan 2023 to’o agora fatin sira ne’ebé halo vizita ba haree prosesu aprendizajen, diskusaun la’os ona kona-ba hakarak ka lakohi, maibé sira husu atu reforsa tán, tanba rezultadu hatudu katak estudante sira ne’ebé mak remata iha programa EMULI hodi hakat ba klasse normál inklui eskola CAFE, sira nia dezempeñu di’ak tebe-tebes.
Aleinde ne’e S.E. Embaixadora Boavontade ba Asuntu Edukasaun Dra. Kirsty Sword Gusmão hateten, ba ema hotu ne’ebé akompaña jornada EMULI durante husi tinan 2023 to’o agora, ohin loron bo’ot tebe-tebes iha luta naruk edukasaun ba ema hotu-hotu iha rai doben Timor-Leste.
“Buat ne’ebé motiva ha’u no ekipa edukadór sira atu implementa programa pilotu Edukasaun Multilinge (EMULI) tinan 2023 liubá mak paixaun bo’ot ida ba edukasaun inkluzivu no nosaun igualidade iha asesu ba edukasaun, katak sistema edukasaun ida ne’ebé la husik labarik ida ba kotuk, tanba de’it iha situasaun sósiu ekonómiku ka tanba lian ne’ebé nia ko’alia iha uma”, dehan Embaixadora Boavontade.
Enkuantu to’o agora sei nafatin iha lian tolu (3) mak Galolen iha Munisípiu Manatutu, Fataluku iha Lautem (Lospalos), Baikeno iha RAEOA no sei kontinua halo espansaun, maibé sei nafatin konsentra ba lian tolu (3) ne’ebé mak preparasaun di’ak ona entermus materiál didátiku no formadór/a sira.
#MédiaME
