Díli – Loron Segunda-Feira, 07 Outubru 2024
Sua Exelénsia Ministra Edukasaun Dra. Dulce de Jesus Soares hamutuk ho Sua Exelénsia Embaixadora Nova-Zelándia iha Timor-Leste Sra. Helen Tunnah no Care International, hala’o vizita koletiva ba Eskola Ensinu Báziku Filiál 1.2 Badomori Venilale Baucau, hodi fahe revista Lafaek edisaun 3/2024 ba estudante sira hodi ajuda dezenvolve sira-nia vontade lee no hadomi livru.
Iha diskursu, Sua Exelénsia Ministra Edukasaun Dra. Dulce de Jesus Soares, hateten, revista Lafaek ne’e iha mós konteudu edukativu sira ne’ebé foti husi kurríkulu Nasional Pré-Eskolár no Ensinu Báziku, nune’e, ba manorin doben sira, favór uza ho efetivu hanesan materiál aprendizajen komplementár hodi fó ba labarik sira atu lori ba uma no fó hanoin ba sira hodi lee hamutuk ho inan-aman.
“Revista Lafaek ne’e hetan tulun husi Governu Nova Zelándia ne’ebé fó fiar ba Care Internationla atu jere no introduz inisiativu Lafaek ne’e, nune’e ha’u agradese ba MFAT no Care International Timor-Leste ba apoiu sira ne’e hodi fó impaktu no iha influénsia pozitivu ba eskola, estudante no mós komunidade sira iha nasaun ida ne’e”, dehan S.E. Ministra Edukasaun.
Governante ne’e hatutan, kualidade edukasaun la’os de’it halo avaliasaun loron-loron, maibé akompaña mós estudante sira-nia prosesu aprendizajen no dezenvolvimentu tomak iha nivel eskolaridade, tanba fatór sira ne’ebé esensiál liu ba edukasaun mak, kualidade hanorin, manorin sira, partisipasaun inan-aman no komunidade, ambiente eskola seguru no amigavel.
Iha fatin hanesan, Sua Exelénsia Embaixadora Nova-Zelándia iha Timor-Leste Sra. Helen Tunnah, hateten, Nova Zelándia nafatin kompremitidu atu suporta revista Lafaek ba Timor-Laran tomak no kada tinan 3 fundu alokadu no tinan 3 mai sei nafatin kontinua apoiu revista Lafaek.
“Reprezenta Governu Nova Zelándia iha ne’e, kontenti tebes, tanba ha’u bele haree rasik revista Lafaek iha komunidade no senti kontenti loos husi ha’u nia fuan laran atu bele haree direta, oinsá revista Lafaek ne’e utiliza iha aula laran no komunidade mós uza hodi hala’o kreatividade”, dehan S.E. Embaixadora NZ.
Embaixadora ne’e hatutan, vizita ida ne’e iha valór bo’ot tebes, tanba bele haree no esperiánsia rasik kona-ba saida mak impaktu husi revista Lafaek no bele ko’alia direta ho kolega sira iha Nova Zelándia katak programa ne’ebé povu Nova Zelándia suporta iha impaktu ba povu Timor-Leste no bele informa atu iha fundu liu tán ba programa ida ne’e.
Iha fatin hanesan, Koordenadór Eskola EBF 1.2 Badomori, Álvaro Bernardo da Silva, hateten, hanesan profesór ne’ebé mak durante ne’e hamutuk ho estudante sira, hakarak agradese ba projetu Lafaek, tanba sira-nia prezensa ajuda tebes ami, la’os de’it manorin sira, maibé mós estudante sira hodi sai hanesan manuál ne’ebé ajuda tebes prosesu aprendizajen .
“Resvista Lafaek nia laran ne’e, iha konteudu no planu ne’ebé simplifika tebes ona hodi ajuda profesór sira hala’o knaar ho di’ak iha sala aula no bainhira ami fó aula liga ho revista Lafaek ne’e, estudante sira mós iha kedas ona revista iha liman no fasil tebes mai ami atu halo komunikasaun iha sala aula no ajuda tebes iha prosesu hanorin nian”, dehan Koordenadór Eskola.
#MédiaME
