Díli – Kinta-Feira, 20 Juñu 2024
Sua Exelénsia Ministra Edukasaun Dra. Dulce de Jesus Soares hamutuk ho Dirijente sira husi Ministériu Edukasaun, hala’o enkontru ho Embaixadora Boavontade ba Asuntu Edukasaun, Dra. Kirsty Sword Gusmão hodi ko’alia kona-ba progresu implementasaun programa Edukasaun Multilinge (EMULI) no nia kontinuasaun ba futuru.
Iha enkontru ne’e, Sua Exelénsia Ministra Edukasaun Dra. Dulce de Jesus Soares hateten, buat ne’ebé mak oan sira atu aprende, mak lian ne’ebé aprende iha eskola hanesan ho lian ne’ebé mak aprende iha uma atu inan-aman sira mós bele ajuda oan sira-nia prosesu aprendizajen liuhusi fó apiniaun ruma, tanba sira kompriende saida mak sira-nia oan sira aprende iha eskola.
“Realidade hatudu katak taxa iliterasia adultu ne’e ás tebe-tebes, signifika katak inan-aman barak mak la eskola no oan mós ba eskola ko’alia lian ne’ebé inan –aman la kompriende, entaun sei difisil liután ba parte rua ne’e atu bele apoia malu, nune’e ho intervensaun liuhusi Edukasaun Multilinge (EMULI) ne’e ho nia objetivu mak atu halo inan-aman bele involve iha oan-nia edukasaun liuhusi lian ne’ebé mak inan-aman no oan ko’alia hanesan iha uma nomós iha eskola”, dehan S.E. Ministra Edukasaun.
Iha fatin hanesan Sua Exelénsia Embaixadora Boavontade ba Asuntu Edukasaun, Dra. Kirsty Sword Gusmão hateten, labarik sira presiza aprende sira-nia lian, tanba husi lian-inan bele introdús konseitu abstratu nomós konseitu intelektuál sira ne’ebé karik sira lahatene liuhusi ko’alia loron-loron iha sira-nia komunidade.
“Tuir lolós edukasaun Multilinge hanesan maneira di’ak ida atu inan-aman sira bele involve maka’as liután iha labarik sira-nia aprendizajen, tanba lian uma nian hanesan ho lian eskola, bainhira labarik sira aprende matéria iha lian portugés iha eskola no lori sira-nia kadernu ba uma nakonu ho lian estranjeiru ida, sira-nia inan-aman labele kompriende no labele apoia sira iha sira-nia prosesu aprendizajen”, dehan S.E. Embaixadora Boavontade.
Enkuantu programa EMULI ne’e implementa ona iha eskola hamutuk sanulu (10), Ensinu Pre-eskolár hamutuk 5 no Ensinu Báziku hamutuk 5, husi Munisípiu tolu (3) mai ho lian tolu (3) diferente, hanesan Galolen iha Munisípiu Manatutu, Baikeno iha RAEOA no Fataluku iha Munisípiu Lautem.
#jornalistaluis
#MédiaME
