Díli – Sexta-Feira, 24 Maiu 2024
Sua Exelénsia Ministra Edukasaun Dra. Dulce de Jesus Soares asina Memorandu Entendimentu ho Uniaun Nasionál Eskuteiru Timor-Leste hodi bele realiza atividade eskuteiru nian iha eskola hanesan atividade ekstru kurrikulár hodi bele ajuda dezenvolvimentu pesoál labarik nian no aprende moris hamutuk ho sosiedade.
Iha entrevista, Sua Exelénsia Ministra Edukasaun Dra. Dulce de Jesus Soares hateten, mezmu seidauk iha akordu, maibé atividade ne’e la’o tiha ona, tanba maioria membru husi Uniaun Nasionál Eskuteiru Timor-Leste ne’e profesór sira.
“Atu garante atividade ne’e bele la’o di’ak iha eskola sira, Ministériu Edukasaun depois halo akordu ida ne’e, ami sei halo despaixu ministeriál ida atu hato’o ba eskola sira atu atividade eskoteiru ne’e sai atividade obrigatóriu no tuir akordu ne’e sei hahú husi ensinu báziku siklu datoluk no ensinu sekundáriu”, dehan S.E Ministra Edukasaun.
Governante ne’e hatutan, atividade ne’e obrigatóriu atu eskola sira halo, tanba atu prienxe iha atividade ekstra kurrikulár ne’ebé mak ajuda dezenvolvimentu pesoál labarik nian no abilidade atu oinsá mak hamutuk atu kria paz hodi bele ajuda malu atu sai amigu, nune’e labarik sira husi ki’ik bele aprende ona oinsá mak bele moris hamutuk iha sosiedade.
Iha fatin hanesan, Prezidente Uniaun Nasionál Eskuteiru Timor-Leste, Sra. Idelta Maria Rodrigues, hateten, akordu ida ne’e hanesan oportunidade ida di’ak tebe-tebes atu bele koordena teknikamente atu oinsá bele operasionaliza servisu sira ne’e bazeia ba mandatu ne’ebé sita hela iha akordu ida ne’e.
“Ami iha korpu formadór sira ne’ebé mak rekoñesidu iha nível rejionál no internasionál, tanba atu fó formasaun ne’e iha ninia regra duni no korpu formadór sira ne’e maioria mai husi profesór sira, tanba ne’e akordu ida ne’e la fasil atu halo buat hotu-hotu kapás, maibé pelumenus loke dalan atu ita bele aprende husi ita-nia esperiénsia, hafoin hein passu tuir mai” dehan Prezidente UNETL.
#
