Lautem – Loron, Tersa-Feira, 30 jullu 2024
Sua Exelénsia Ministra Edukasaun Dra. Dulce de Jesus Soares hamutuk ho Parseria ba Dezenvolvimentu Umanu (PHD-sigla inglés) husi Embaixada Australia no Autoridade Munisípiu Lautem, akompaña formasaun kona-ba Edukasaun Multilinge (EMULI) ba manorin sira ne’ebé mak atu hanorin programa ne’e iha sira nia eskola. Formasaun ne’e hala’o iha edifísiu Servisu Edukasaun Munisípiu Lautem.
Iha entrevista, S.E. Ministra Edukasaun, Dra. Dulce de Jesus, hateten, rezultadu husi estudu ne’ebé iha katak, estudante sira ne’ebé mak hahú prosesu aprendizajen liuhusi programa EMULI, sira-nia nivel literasia no numerasia ass liu.
“Bazeia ba prinsipiu katak, labele husik estudante ida iha kotuk no labarik hotu-hotu tenki asesu ba iha edukasaun ho kualidade, mak Ministériu Edukasaun nafatin hili programa EMULI atu reforsa nafatin kualidade edukasaun iha Timor-Leste”, dehan S.E. Ministra Edukasaun.
Governante ne’e hatutan, Tinan 2025 sei espanda tán ba eskola seluk, maibé nafatin iha Munisípiu Lautem, Manatutu no RAEOA bazeia ba pedidu husi eskola sira ne’ebé mak identifika katak presiza hala’o programa EMULI no uza kurríkulu baze nasionál kona-ba progresaun linguístika hodi aprende uluk lian materna hafoin hakat ba lian tetun no portugés.
Formasaun programa EMULI ne’e, atu hasa’e manorin sira-nia koñesimentu hodi hanorin iha Eskola Pré-Eskolár hamutuk 11, Eskola Ensinu Báziku hamutuk 10 iha Munisípiu Lautem nomós eskola 5 husi Manatutu.
#MédiaME
