Dili, 12 Janeiru 2023 (SAPIENTIA)-Diretor Nasional Dezenvolvimentu parke eskolár (DNDPE), Agostuno Soares, relata projeitu kapital dezenvolvimentu hamutuk 20 hosi Ministériu Edukasaun, Juventude no Desportu (MEJD) nian ne’ebe liu hosi prosesu konkursu publiku ne’e iha projeitu hitu mak konklui ona.
Projeitu kapital dezenvolvimentu ne’e hotu-hotu liu hosi konkursu públiku ne’ebe ita iha projeitu 20 no agora kuaze projeitu hitu mak konklui ona, agora sei falta projeitu hamutuk 13 mak sei iha hela prosesu konstrusaun fiziku,” Diretor ne’e hateten ba Sapientia iha Gabinete Dirasaun Parke Eskolar Ministeru Edukasaun, Juventude no Desportu Vila Verde Dili.
Tuir olanu metade projeitu kapital dezenvolvimentu hamutuk 13 ne’e sei konklui iha marsu nia klaran, tanba agora dadaun kuaze progresu fiziku ba projeitu 13 ne’e atinje ona 50%.
Nune’e, DNDPE halo ona notifikasaun ba projeitu hirak ne’e atu nuene’e iha primeiru trimester tinan ida-ne’e nia rohan ka inisiu hosi segundu trimestre tenke konklui ona.
Hosi projeitu hitu ne’ebe hatudu ona ninia progresu ne’e maka hanesan eskola Ensinu Baziku terseiru siklu ida, ensinu sekundariu jeral ida no eskola Tekniku Vokasional lima, eskola sira ne’e lokaliza iha munisipiu lima. Aileu, Covalima, Dili, Lospalos no Ermera.
Hosi Aileu, konstrusaun ba eskola ensinu sekundariu tekniku vokasional ida, Covalima prejeitu konstrusaun ida ba eskola ensinu sekundariu tekniku vokasional Akar Lara, Dili projeitu konstrusaun ida ba edifisiu eskola ensinu baziku sentral Sergio Vieira de Melo Becora ne’ebe inaugura ona iha tinan kotuk.
Nune’e mos, hosi bens servisu nian projeitu konstrusaun iha Lospalos ba eskola rua, maka hanesan eskola Ensinu Sekundariu Tekniku Vokasional Lai-Iku no Eskola Ensinu Sekundariu Tekniku Vokasional Lautem no hosi Ermera konstrusaun ba eskola ida iha ensinu sekundariu jeral Cesar Maulaka “Maukruma”.
Tuir planu, Ministeriu Edukasaun, Juventude no Desportu nian iha tinan 2022 ne’e prosesu konstrusaun ba nivel ensinu sekundariu nia eskola TEKVOK maka maioria iha territoriu nasional, tanba prioridade governu nian oinsa atu proteja kompetensia no abilidade estudante sira-nian hodi responde ba kampu servisu.
Tanba ne’e, nia hateten, MEJD tau prioridade hodi instala infraestrutura edukativa ba tekniku vokasional iha territoriu nasional.
Media. Sapientia. Bosco
