Ermera, loron 28 fulan Novembru 2024
Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos sai Inspetór ba serimónia isár Bandeira RDTL iha ámbitu komemorasaun loron Proklamasaun Independénsia ba dala-49 iha Munisípiu Ermera, Postu Administrativu Hatulia B, kinta-feira ne’e.
Hafoin remata leitura diskursu husi Prezidente Repúblika nian iha entrevista Sua Exelénsia Sekretáriu Estadu ESJ-ESTV hateten, komemorasaun loron Proklamasaun Independénsia tinan ida ne’e fó hanoin hikas ba hotu-hotu, liu-liu Juventude sira estuda didi'ak hodi kontinua luta ne'ebé heroi sira husik hela ba jerasaun foun.
"Futuru ne’e iha juventude nian liman, liu-liu juventude iha Postu Administrativu Hatulia B, mai ita hamutuk forsa ida de'it hodi hakat ba oin, banati tuir saida mak iha momentu ne'eba ita nia heroi sira halo ba rai ida ne’e".
Serimónia komemorasaun loron Proklamasaun Independénsia ba dala-49 iha Postu Administrativu Hatulia B ne’e partisipa husi Estudante sira, Diretór Edukasaun Munisípiu no Dirijente sira, Autoridade lokál sira no entidades sira husi Postu Administrativu Hatulia B.
#MédiaME
