ME HALA’O VIZITA BA ENSINU BÁZIKU FILIÁL FATU’U
Atauru – Loron Segunda-Feira, 05 Agustu 2024
Sua Exelénsia Ministra Edukasaun Dra. Dulce de Jesus Soares ho ekipa, la’o ain kuaze kilómetru 8 hodi ba vizita eskola Ensinu Báziku Filiál Fatu’u, Suku Biqueli, Rejiaun Administrativu Espesiál Atauru hodi haree direta kondisaun eskola no hala’o teste literasia no numerasia ba estudante sira liga ho matéria ne’ebé hetan iha prosesu aprendizajen loron-loron.
Iha vizita ne’e, Sua Exelénsia Ministra Edukasaun Dra. Dulce de Jesus Soares, hateten, susesu Ministériu Edukasaun nian tenki hatudu iha labarik sira-nia dezempeñu, tanba ne’e hanesan Ministra, louva manorin sira ne’ebé konsege hanorin oan sira lee hatene.
“Antes ko’alia, sempre haree uluk sala aula, tanba manorin sira-nia dezempeñu tenki hatudu iha sala aula, hafoin tama ba haree sala profesór arrumadu no organizadu tebes, tama fali ba sala aula nakonu ho espozisaun servisu estudante sira nian, signifika katak manorin sira prátika duni matéria ne’ebé sira simu iha formasaun”dehan Ministra Edukasaun.
Governante ne’e hatutan, kadeira ne’e estudante uza hodi aprende ne’e uluk nian no balun tohar ona, tanba ne’e semana-oin kadeira foun ho totál 90 sei to’o mai iha eskola ne’e no husu ba inan-aman hodi fó rai atu harii fila-fali Pré-Eskolár ne’ebé antes ne’e iha, maibé anin sobu tiha ona.
Remata tiha vizita ne’e, S.E. Ministra Edukasaun Dra. Dulce de Jesus Soares, S.E. Ministra Solidaridade Sosiál Dra. Verónica das Dores, S.E. Ministra Saúde Dra. Elia Reis Amaral, S.E. Vise-Ministra Asuntu ASEAN Dra. Milena Maria da Costa Rangel no S.E. Vise-Ministra Finansas Dra. Felísia Claudinanda Cruz Carvalho, fahe ai-han komplementár ba família kbi’it laek sira iha Fatu’u Suku Biqueli.
#MédiaME
