Dili, 19-Outubru-2026, Sua Exelénsia Sekretáriu Estadu ESJ-ESTV Sr.Domingos Lopes Lemos kontinua halo monitorizasaun no observasaun direta ba prosesu realizasaun Ezame Nasionál Tinan Eskolar 2026, iha eskola Ensinu Sekundáriu Jerál Finantil no 10 Dezembru Comoro Segunda-Feira ne’e.
Objetivu prinsipál husi vizita Sua Exelénsia Sekretáriu Estadu ESJ-ESTV mak atu observa no haree diretamente preparasaun no implementasaun Ezame Nasionál ba estudante sira, ne’ebé hala’o durante loron tolu no akompañamentu ne’e importante atu asegura katak prosesu ezame la’o ho di’ak, ordenadu no tuir prosedimentu ne’ebé estabelese.
Sekretáriu Estadu no ekipa akompañante sira mós iha oportunidade atu observa situasaun iha eskola no akompañamentu ba estudante sira durante prosesu ezame, hodi asegura katak sira bele hala’o ezame ho tranquilidade no responsabilidade.
Ezame Nasionál nu’udar etapa importante ida iha prosesu ensinu no aprendizajen, tanba sai hanesan instrumentu atu avalia koñesimentu, kapasidade no kompeténsia ne’ebé estudante sira hetan durante sira-nia estudu. Tanba ne’e, apoiu no supervizaun husi lideransa Ministériu Edukasaun, hamutuk ho dirijente eskola no profesór sira, iha papél importante atu garante prosesu avaliasaun ne’e la’o ho efikásia, transparénsia no kredibilidade.
Ministériu Edukasaun kontinua fó atensaun ba kualidade edukasaun no implementasaun prosesu avaliasaun nian, hodi asegura katak estudante sira hetan oportunidade atu demonstra sira-nia kapasidade no prepara an ba etapa edukasaun tuirmai.
