Díli, 16 Outubru 2026 – Sua Exelénsia Ministra Edukasaun, Dra. Dulce de Jesus Soares, hamutuk ho Sua Exelénsia Sekretáriu Estadu ba Ensinu Sekundáriu Jerál no Ensinu Sekundáriu Tékniku-Vokasionál, Sr. Domingos Lopes Lemos, no dirijente sira Ministériu Edukasaun nian, distribui materiál Ezame Nasionál Tinan Letivu 2026 ba Diretór no Superintendente Servisu Edukasaun Munisipál sira, atu garante preparasaun no ezekusaun ezame ne’ebé seguru, ordenadu no tuir prosedimentu.
Iha serimónia ne’e, Ministra Edukasaun husu ba responsavel sira atu asegura koordenasaun, pontualidade, dixiplina no konfidensialidade materiál ezame nian durante prosesu simu no distribuisaun. Nia mós enfatiza importánsia monitorizasaun no supervizaun atu asegura katak ezame ba estudante klase 9 no klase 12 hala’o ho integridade, transparénsia no tuir kalendáriu ne’ebé estabelese ona.
Iha parte seluk, Sekretáriu Estadu Domingos Lopes Lemos subliña katak Ezame Nasionál mak instrumentu importante atu sukat koñesimentu no kapasidade estudante sira durante tinan tolu nia laran. Nia enkoraja estudante sira atu prepara an ho di’ak, halo ezame ho kalma, konsentrasaun no integridade, hodi hatudu sira-nia koñesimentu no kapasidade hanoin kritiku.
Susesu Ezame Nasionál mak responsabilidade hamutuk, ne’ebé presiza koordenasaun, dixiplina no supervizaun konsistente husi estrutura edukasaun hotu.
