Ermera, 02 Outubru 2026 — Ministériu Edukasaun kontinua implementa reforma kurríkulu Ensinu Báziku, liuliu ba klase 8.º, liuhosi projetu investigasaun sosiál iha prosesu hanorin no aprendizajen, hodi dezenvolve kapasidade estudante sira iha peskiza, análize no buka solusaun ba problema sosiál iha komunidade.
Formadór Siénsia Sosiál iha Munisípiu Ermera, Leandro Fernandes Casimiro, esplika katak investigasaun sosiál fó oportunidade ba estudante sira atu identifika problema iha komunidade, halibur no analiza dadus iha terrenu, no propoin solusaun.
Aprosimasaun ida-ne’e mós aliña ho dezenvolvimentu abilidade sékulu 21, tanba estudante sira aprende liuhosi esperiénsia direta no sai parte ativu iha prosesu investigasaun.
Iha formasaun, manorin sira hetan orientasaun kona-ba métodu atu orienta estudante sira, hahú husi prepara pergunta, halibur dadus, halo análize, akompaña atividade iha terrenu no aprezenta rezultadu investigasaun.
Manorin Marcelo Meneses da Silva, husi EBF N.º 216 Peorema, konsidera investigasaun sosiál nu’udar atividade importante atu dezenvolve kapasidade estudante sira iha análize problema no buka solusaun, no prepara sira ba estudu akadémiku iha futuru.
Formasaun Faze III iha Munisípiu Ermera hala’o durante loron tolu, husi 30 Setembru to’o 2 Outubru 2026, ho partisipasaun husi manorin klase 8.º na’in-131, kompostu husi manorin Fraternidade Umana na’in-35, Siénsia Sosiál na’in-41 no Lian Tétun na’in-37.
