Dili, 03 Outubro 2026- Sua Exelénsia Ministra Edukasaun Dra. Dulce de Jesus Soares hamutuk ho família Matebian husi Dra. Helen Hill husu misa no hala’o Serimónia Inaugurasaun Monumentu ba Dra. Helen Hill nian, iha semitériu Santa Cruz Dili Sábadu ne’e
“Ohin Ministériu Edukasaun ho família Matebian Dra, helen Hill no alumni sira ne’ebé durante Matebian esforsu hodi haruka ba kontinua sira-nia estudu iha Austrália hodi fó onra Dra. Helen Hill, ninian dedikasaun mai Timor-Leste liliu ba área edukasun nian tanba nia kontribuisaun boot tebes hodi lori Timor-Leste nia lian ba mundu internasionál no ajuda dezenvolve edukasun iha rai-laran”.
Ita hotu hatene matebian Dra. Helen Hill nia dedikasaun ba Timor-Leste no ninia solidariedade naruk hodi fó apoia ba autodeterminasaun, edukasaun, no dezenvolvimentu komunitáriu. Ativista, akadémika, no belun boot Timor-Leste nian to’o matebian hakotu iis iha Austrália iha loron 7 fulan-Maiu tinan 2024.
Durante nia moris nia husik hela legadu no kontribuisaun boot mak:
• Pioneira Solidariedade (1975): Nia vizita Dili ba dala uluk iha inísiu tinan 1975. Bainhira Indonézia invade Timor-Leste, nia hakerek livru ho títulu The Timor Story (1976), ne’ebé sai hanesan dokumentu akadémiku dahuluk hodi loke mundu nia matan kona-ba povu Timór nia terus no direitu ba independénsia
• Ko-fundadora Asosiasaun: Nia mós ajuda harii Austrália-East Timor Association (AETA) iha tinan 1975 no Timor-Leste Studies Association (TLSA) iha tinan 2005 hodi halo kampaña internasionál hodi apoia Timor-Leste.
• Matenek-na’in no Mentora: Nu’udar profesora iha Victoria University no Professora Convidada iha Universidade Nasionál Timor Lorosa’e (UNTL), nia fó dezenvolvimentu no dezafiu ba estudante Timoroan rihun ba rihun.
• Kondekorasaun Estadu: Tanba ninia dedikasaun tomak ba rai ida-ne’e, Estadu Timor-Leste fó kondekorasaun Ordem de Timor-Leste ba nia iha tinan 2014.
Ohin ita haree de’it mak Dra. Helen Hill ninian imajen no Monumentu Kampa ne’e sai hanesan memoria ida mai Timor-Leste.
