Atividade

Parlamentu Nasionál aprova proposta OJE 2027 iha faze Jeneralidade ho Votus Afavór 41 no Abstensaun 23

Díli, 11 Novembru 2026 – Ministra Edukasaun, Dra. Dulce de Jesus Soares, hamutuk ho Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál (ESJ-ESTV), Sr. Domingos Lopes Lemos, partisipa iha debate Plenária Parlamentu Nasionál kona-ba Proposta Lei Orsamentu Jerál Estadu (OJE) 2027, ne’ebé hala’o durante loron tolu no hetan aprovasaun iha faze jeneralidade, iha kuarta-feira (11/11), ho votus afavór 41, kontra zero no abstensaun 23.

Partisipasaun Ministra Edukasaun no Sekretáriu Estadu ESJ-ESTV iha debate ne’e hatudu akompañamentu no envolvimentu lideransa setór edukasaun iha prosesu diskusaun no apresiasaun ba Proposta OJE 2027, liuliu kona-ba prioridade, alokasaun rekursu no dezenvolvimentu setór edukasaun ba tinan fiskál 2027.

Proposta OJE 2027 iha montante globál konsolidadu millaun US$2.568,5, ho lema “Hametin Reziliénsia Liuhosi Transformasaun: Diversifika Ekonomia ba Futuru Sustentável”.

Orsamentu ne’e prevé alokasaun millaun US$2.487 ba Administrasaun Sentrál, millaun US$56,1 ba Rejiaun Administrativa Espesiál Oe-Cusse Ambeno (RAEOA) no millaun US$186,55 ba Seguransa Sosiál.

Prioridade prinsipál OJE 2027 inklui diversifikasaun ekonomia, investimentu produtivu, kriasaun empregu, hadi’a prestasaun servisu públiku no asegura sustentabilidade finanseira públika, tuir Programa Governu no Planu Estratéjiku Dezenvolvimentu Nasionál 2011–2030.

Durante sesaun diskusaun iha parte dadeer, Primeiru-Ministru hato’o resposta ba relatóriu no paresér Komisaun Finansas Públikas Parlamentu Nasionál, inklui mós ba intervensaun, komentáriu no pergunta sira ne’ebé deputadu sira hato’o durante debate iha plenária. Ministériu Edukasaun kontinua akompaña prosesu aprovasaun OJE 2027, nu’udar parte hosi kompromisu institusionál atu asegura katak prioridade no nesesidade setór edukasaun hetan konsiderasaun iha planeamentu no jestaun orsamentu Estadu ba tinan fiskál 2027.