Likisá, 11-11-2026 – Sua Exelénsia Sekretáriu Estadu ba Ensinu Sekundáriu Jerál no Ensinu Sekundáriu Tékniku-Vokasionál (ESJ-ESTV), Sr. Domingos Lopes Lemos, taka ofisialmente Kompetisaun Nasionál Edukativa Intelijente no Inovadora, ne’ebé hala’o iha Eskola Sekundária Jerál Públika Númeru 1 Likisá, iha kuarta-feira (11/11). Iha serimónia ne’e, akompaña husi Diretór Jerál Ensinu Báziku, Sr. Apolinário Serpa Rosa, no Diretór Nasionál Ensinu Sekundáriu Tékniku-Vokasionál (ESTV), Sr. Pedro da Silva Ximenes.
Iha intervensaun, Sr. Sekretáriu Estadu Domingos Lopes Lemos hato’o katak kompetisaun ne’e reprezenta oportunidade importante atu avalia no dezenvolve kapasidade, koñesimentu no abilidade prátika estudante sira nian, liuhusi aplikasaun direta ba matéria no lisaun ne’ebé sira aprende durante prosesu ensinu-aprendizajen iha eskola.
Nia esplika katak kompetisaun ne’e iha karaterístika diferente kompara ho kompetisaun konvensionál, tanba nia objetivu mak promove edukasaun intelijente no inovadora, liuhusi métodu ne’ebé fó oportunidade ba estudante sira atu demonstra sira-nia koñesimentu no abilidade iha área siénsia sosiál, siénsia umana no siénsia teknolojia.
Sekretáriu Estadu mós enfatiza katak iha kompetisaun ida-idak, sei iha vensedór no partisipante balu seidauk hetan rezultadu tuir sira-nia espetativa. Maski nune’e, rezultadu kompetisaun la signifika katak eskola ne’ebé la hetan vitória mak lakon. Ba nia, estudante hotu mak vensedór, tanba sira hotu hetan esperiénsia foun, koñesimentu no oportunidade atu aprende no troka esperiénsia malu.
“Objetivu prinsipál kompetisaun ne’e la’ós de’it atu haree sé mak manán ka lakon, maibé atu sukat kapasidade no koñesimentu ne’ebé estudante sira hetan durante prosesu aprendizajen, ho apoiu husi profesór sira,” dehan Sekretáriu Estadu.
Iha okaziaun ne’e, nia fó mós motivasaun ba estudante sira ne’ebé seidauk hetan rezultadu tuir espetativa atu kontinua estuda ho seriedade, identifika área fraku sira no halo esforsu kontinuu atu hadi’a no dezenvolve kapasidade rasik. Entretantu ba estudante sira ne’ebé partisipa, nia husu atu lori esperiénsia no koñesimentu ne’ebé sira hetan durante kompetisaun ne’e fila ba sira-nia eskola, atu fahe ho kolega sira-seluk.
Aleinde ne’e, Sekretáriu Estadu hato’o mensajen katak oportunidade atu hetan matenek no koñesimentu la limita de’it iha área urbana ka sidade, maibé eziste iha fatin hotu-hotu. Ho vontade, dixiplina no esforsu kontinuu, estudante sira bele dezenvolve sira-nia kapasidade, inklui liuhusi utilizasaun ekipamentu eletróniku no teknolojia dijitál ho maneira produtiva no responsavel.
Nia mós subliña katak motivasaun atu aprende tenke mai husi inisiativa no vontade rasik husi estudante sira, la’ós tanba obrigasaun de’it husi inan-aman ka família. Tanba ne’e, estudante sira tenke dezenvolve kultura aprende ne’ebé bazeia ba interese, responsabilidade no kompromisu atu buka koñesimentu.
Atu remata Sekretáriu Estadu hato’o apresiasaun no agradese ba estudante, profesór, organizadór no entidade hotu ne’ebé kontribui ho esforsu no kompromisu atu asegura katak kompetisaun ne’e hala’o ho susesu.
Serimónia enserramentu kompetisaun ne’e konta ho partisipasaun husi Diretór Jerál Ensinu Sekundáriu, Diretór Nasionál sira husi ESJ no ESTV, Diretór Servisu Edukasaun Munisipál Likisá, Superintendente, ekipa juri, Diretór eskola, profesór akompañante no estudante reprezentante husi eskola sira ne’ebé partisipa.







