Soi-Lesu,13 Outubro 2026 – Ministra Edukasaun, Dra. Dulce de Jesus Soares, hamutuk ho Embaixadór Koreia ba Timor Leste Jang Hyeon,KOICA no UNICEF partisipa iha serimónia lansamentu inisiál konstrusaun eskola pré-eskolár públika foun 14 iha Munisípiu Bobonaro no Baucau, liuhosi projetu.
Iha serimónia ne’ebé hala’o iha Suku Soilesu, Munisípiu Bobonaro, Ministra Edukasaun afirma katak Edukasaun Infánsia Sedu (ECCE) nu’udar prioridade nasionál, tanba tinan dahuluk iha labarik nia moris importante tebes ba dezenvolvimentu fíziku, kognitivu, sosiál no emosionál, no sai baze ida metin ba aprendizajen iha futuru.
Ministra hatete katak, tuir dadus Sistema Informasaun Jestaun Edukasaun (EMIS) tinan 2025, taxa matríkula líkida pre-eskolár iha nivel nasionál atinje 29,24%. Tanba ne’e, Governu estabelese meta atu aumenta partisipasaun labarik sira iha pré-eskolár to’o 60% iha tinan 2028.
Projetu ne’e inklui konstrusaun pré-eskola foun 14 no reabilitasaun ba edifísiu eskola 20 ne’ebé eziste ona, atu hadi’a asesu ba edukasaun ho kualidade, liuliu ba labarik sira iha área rurál no remota.
Ministra mós hato’o agradesimentu ba Governu Repúblika Koreia, Ajénsia Kooperasaun Internasionál Koreia (KOICA) no UNICEF, tanba apoiu no kolaborasaun ne’ebé fó kontribuisaun importante ba dezenvolvimentu edukasaun iha Timor-Leste.
Ministra mós subliña katak konstrusaun infraestrutura eskolár tenke akompaña ho preparasaun profesór kualifikadu, materiál aprendizajen apropriadu, lisensiamentu no akreditasaun eskola, subsídiu eskolár no programa merenda eskolár, atu garante ambiente aprendizajen ne’ebé seguru, inkluzivu no favorável ba dezenvolvimentu labarik sira.
Ministra Edukasaun enkoraja mós inan-aman, komunidade no autoridade lokál sira atu kontinua kolabora ho Governu hodi asegura labarik hotu-hotu hetan oportunidade atu aprende no dezenvolve sira-nia kapasidade hosi idade sedu.
Projetu ne’e reprezenta pasu importante ida hodi hametin asesu ba edukasaun pré-eskolár no harii baze ida metin no edukasaun ne’ebé forte ba jerasaun foun iha Timor-Leste.
